.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 215
Hüküm no: 263
Orijinal metin no: [144-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Efendi b. Abdi’nin mülk odasını Musa b. Ömer’e satıp bedelini tahsil ettiği

Havâss-ı aliyye kazâsına tâbi‘ Hasköy mahallâtından el-Hâc Şaban mahallesinde sâkin Ahmed Efendi b. Abdi el-İmâm nâm kimesne meclis-i şer‘-i hatîr-i lâzımü’t-tevkīrde Musa b. Ömer nâm kimesne mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûr[e]de vâki‘ bir tarafı Mehmed b. Ömer mülkü ve bir tarafı tarîk-i hâs ve iki tarafı bâyi‘-i mezbûr Ahmed Efendi mülkü ile mahdûd ve mümtâz olan bir bâb tahtânî odayı ve bir sofayı ve muhavvatayı müştemil olan [145] mülk odamı mezbûr Musa’ya nakd-i râyic fi’l-vakt üç bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ol dahi vech-i mübeyyen üzre iştirâ ve tesellüm eyledi, ba‘de’l-yevm zikr olunan oda mezbûr Musa’nın mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun minvâl-i muharrer üzre sudûr ve zuhûr eden ikrâr ve i‘tirâfın el-mukarru lehü’l-mezbûr Musa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Şevvâli’l-mükerrem li sene semânin ve erba‘în ve elf.


Şuhûdü’l-hâl: Mehmed Bey b. Pürkadem, Mustafa Çelebi b. Halil es-Serrâc, Abdülbâkī Çelebi b. Mahberi?, Hasan b. Uğurlu, Sûf? Hüseyin el-Müezzin, Ali b. Abdullah, Himmet b. Pürkadem ve gayruhüm mine’l-hâzırîn