.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 219
Hüküm no: 270
Orijinal metin no: [147-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Gülbeği v. Bayik’in Balkıza Hâtun Vakfı ile davalı olduğu arsayı vakfa bağışladığı

Havâss-ı aliyye kazâsına tâbi‘ Hasköy’de sâkin Ermeni tâ’ifesinden Gülbeği v. Bayik nâm Ermeni meclis-i şer‘-i hatîr-i lâzımü’t-tevkīrde işbu râfi‘ü’l-kitâb Balkıza Hâtun Vakfı’na bi’l-fi‘il mütevellî olan fahrü’l-akrân Mustafa Çelebi b. Mehmed nâm kimesne mahzarında bi’t-tav‘i’s-sâf ikrâr ve takrîr-i kelâm edip karye-i mezbûrede [148] vâki‘ lede’l-ahâlî ve’l-cîrân ma‘lûmü’l-hudûd olan mülk arz-ı hâliyemin bir tarafı mârrü’z-zikr Balkıza Hâtun Vakfı olup vakf-ı mezbûrun mütevellîsi olan mezbûr Mustafa Çelebi[‘yi] zikr olunan arz-ı hâliyemden tûlen on bir buçuk zirâ‘ ve arzan bir zirâ‘ arz-ı hâliyemi tasarruf eyledin deyû da‘vâ ve taleb eylemiş idim, el-hâletü hâzihî zikr olunan tûlen on bir buçuk zirâ‘ ve arzan bir zirâ‘ arz-ı hâliyeyi vakf-ı mezbûra teberru‘ ve da‘vâ-i mezbûrdan fâriğ oldum dedikde, mukırr-ı merkūmun ikrâr-ı meşrûhunu el-mukarru lehü’l-mezbûr mütevellî bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min Zilka‘deti’ş-şerîfe li sene semânin ve erba‘în ve elf.


Şuhûdü’l-hâl: Mahmud Çelebi b. Mehmed es-Serrâc, Mustafa Çelebi b. Halil es-Serrâc, Mustafa Çavuş b. Abdullah, Osman Bey b. Mustafa es-Serrâc, Ali Beşe b. Abdullah, Ali Beşe b. Mustafa, Veli b. Hasan, Hüseyin b. Abdullah, Ali b. Abdullah