|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 219 Hüküm no: 271 Orijinal metin no: [148-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Gülbeği v. Bayik’in vakfa bağışladığı kısmın dışında kalan arâzi ile vakfın ilgisinin olmadığı
Merhûm Kasım Paşa kızı Balkıza Hâtun Vakfı’na bi’l-fi‘il mütevellî olan fahrü’l-akrân Mustafa Çelebi b. Mehmed nâm kimesne mahfil-i kazâda işbu râfi‘ü’l-kitâb Gülbeği v. Bayik nâm Ermeni muvâcehesinde takrîr-i kelâm edip vakf-ı mezbûrdan olup Havâss-ı aliyye kazâsına tâbi‘ Hasköy’de vâki‘ lede’l-ahâlî ve’l-cîrân ma‘lûmü’l-hudûd olan vakıf menzilin bir tarafı mezbûr Gülbeği’nin tûlen otuz iki buçuk zirâ‘ mülk arz-ı hâliyesi olup arzan bir zirâ‘ tûlen on bir buçuk zirâ‘ arz-ı hâliyeyi vakf-ı mezbûra teberru‘ eyledi, bâkī tûlen otuz bir buçuk zirâ‘ arz-ı [hâ]liyede vakf-ı mezbûrun alâkası ve medhali yokdur dedikde, mütevellî-i merkūmun kelimât-ı meşrûhasını el-mukarru lehü’l-mezbûr Gülbeği bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’r-râbi‘ aşer min Zilka‘deti’ş-şerîfe li sene semânin ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Mustafa Çelebi b. Halil es-Serrâc, Muzaffer Çavuş b. Abdullah, Osman Bey b. Mustafa es-Serrâc, Ali Beşe b. Ahmed, Ali Beşe b. Mustafa, Veli b. Hasan, Hüseyin b. Abdullah, Ali b. Abdullah
|