|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 220 Hüküm no: 272 Orijinal metin no: [149-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Manol v. Yani’nin câriyesini azat ettiği
Mahmiye-i İstanbul mahallâtından Eski Cum‘a Pazarı kurbunda sâkin Manol v. Yani nâm zimmî tarafından husûs-ı âti’l-beyânı ikrâra vekîl olup Aleksandra v. Nikola ve Yorgi v. Mihal nâm zimmîler şehâdetleri ile vekâleti sâbite olan Zaharya v. İstefani nâm zimmî meclis-i şer‘-i hatîr-i lâzımü’t-tevkīrde müvekkilim mezbûr Manol’un silk-i mülkünde münselik olan orta boylu açık kaşlı gök elâ gözlü sarışın ve boynunun sağ tarafında et benli ve sol elinin parmağında eser-i cerh olan Koroniyyetü’l-asl Preşkova bt. Padişkev nâm câriye-i memlûkesinin muvâcehesinde bi’l-vekâle ikrâr ve takrîr-i kelâm edip sıfat-ı mezkûre ile mevsûfe olan câriye-i mezbûreyi tahrîr ve i‘tâk ve mülkünden izâle ve ihrâc ve silk-i ahrâr-ı asliyyesine indirâc eyledi, ba‘de’l-yevm mezbûre câriye sâir ahrâr-ı asliyyîn gibi hürre olsun, sâir mevâlî için sâbit olan hakk-ı velâdan gayrı hakkı kalmadı dedikde, vekîl-i merkūmun ikrâr-ı meşrûhunu el-mukarru leha’l-mezbûre Preşkova bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Zilka‘deti’ş-şerîfe li sene semânin ve erba‘în ve elf.
Şuhûdü’l-hâl: Ali b. Abdullah, Paş? v. Manol, Raskaraki? v. Manol, Yorgi v. Petrozahi?, Andon v. Petro, Todori [v.] Benli Yani, Dimitri v. Yani ve gayruhüm mine’l-hâzırîn
|