|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 220 Hüküm no: 273 Orijinal metin no: [149-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Bey b. Mustafa’nın mutasarrıf olduğu vakıf dükkânların tasarruf hakkını Salamon v. Avraham’a devrettiği
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin Mehmed Bey b. Mustafa nâm bevvâb-ı sultânî meclis-i şer‘-i hatîr-i lâzımü’t-tevkīrde işbu râfi‘-i hâze’s-sifr Salamon v. Avraham nâm Yahudi muvâcehesinde bi’t-tav‘i’s-sâf ikrâr ve takrîri kelâm edip merhûm Ahmed Çelebi Vakfı’ndan olup karye-i mezbûre mahallâtından Pîrî Paşa mahallesinde vâki‘ bir tarafı ( ) bt. Ahmed nâm hâtun mülkü ve iki tarafı vakf-ı mezbûr ve bir tarafı tarîk-i âm ile mahdûd ve mümtâz olan bir bâb berber dükkânı ve bir bâb attâr dükkânı ve bir bâb mahzeni müştemil olup vakf-ı mezbûrdan yevmî iki akçe icâre-i mu‘accele ve müeccele ile mutasarrıf olduğum dükkânların hakk-ı tasarrufunu vakf-ı mezbûrun mütevellîsi izniyle mezbûr Salamon’a [150] tefvîz eyledim, ol dahi vech-i mübeyyen üzre tefevvuz ve kabûl eyleyip mukābele-i tefvîzde yedinden nakd-i râyic fi’l-vakt yirmi bin akçe alıp kabz eyledim, mâdem ki beher mâh zikr olunan dükkânların icâre-i müeccelesin vakf-ı mezbûr zâbitlerine edâ ve îfâ eyleye tasarrufuna bir ferd mâni‘ olmaya dediğinde, mukırr-ı merkūmun ikrâr-ı meşrûhunu el-mukarru lehü’l-merkūm Salamon bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Zilka‘deti’ş-şerîfe li sene semânin ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Mehmed Çelebi b. Mustafa el-İmâm, Mehmed Halîfe b. İbrahim el-Müezzin, Mehmed Beşe b. Hasan er-Râcil, Ahmed Çelebi b. Muslu, Mehmed b. Abdullah, Osman Bey b. Mustafa es-Serrâc, Ali b. Abdullah ve gayruhüm
|