|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 221 Hüküm no: 274 Orijinal metin no: [150-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Çelebi b. Muslu’nun tasarrufundaki vakıf dükkânın babasından intikal ettiği
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Sabiha bt. Abdullah nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb sulbî kebîr oğlu Ahmed Çelebi b. Muslu nâm kimesne mahzarında bi’t-tav‘i’s-sâf ikrâr ve takrîr-i kelâm edip merhûm Pîrî Paşa Vakfı’ndan olup karye-i mezkûre mahallâtından Pîrî Paşa mahallesinde vâki‘ lede’l-ahâlî ve’l-cîrân ma‘lûmü’l-hudûd olan bir bâb dükkân icâre-i mu‘accele ve müeccele ile oğlum mezbûr Ahmed’in taht-ı tasarrufundadır, zikr olunan vakıf dükkânda benim aslâ alâka ve medhalim yokdur ve zikr olunan dükkân oğlum mezbûr Ahmed Çelebi’nin bundan akdem fevt olan babası Muslu Çelebi’den intikāl eylemişdir dedikde, mukırra-i merkūmenin ikrâr-ı meşrûhasını el-mukarru lehü’l-mezbûr Ahmed Çelebi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis ve’l-ışrîn min Zilka‘deti’ş-şerîfe li sene semânin ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Mehmed Çelebi b. Mustafa el-İmâm, Mehmed Halîfe b. İbrahim el-Müezzin, Ali b. Abdullah
|