|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 222 Hüküm no: 276 Orijinal metin no: [151-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Menahim’in kardeşi Mosi ile olan anlaşmazlığının harcırah davasından olduğu ve iddiasını ispatlayamadığı
Mahmiye-i İstanbul sükkânından olup Edirne cemâ‘atinden olan Mosi v. Yahuda nâm Yahudi mahfil-i kazâda karındaşı Menahim nâm Yahudi mahzarında üzerine takrîr-i da‘vâ edip mezkûr Menahim ile medîne-i İznikmid’e cevâhir bey‘ etmek için gidip harcırâhın sülüsü benim ve sülüsânı mezbûr Menahim’in olup zikr olunan harcırâha sarf ettiğim dört bin yedi yüz akçeyi ve yine kendine ikrâz ve teslîm ettiğim on iki aded esedî guruşu taleb ederim suâl olunup edâsına tenbîh olunması matlûbumdur dedikde, gıbbe’s-suâl mezkûr Menahim cevâbında fi’l-vâki‘ hâl minvâl-i muharrer üzredir lâkin zikr olunan on iki aded esedî guruşu harcırâha sarf eyledim dedikde merkūm Mosi zikr olunan on iki aded esedî guruşu harcırâha sarf eylediğini münkir olıcak mezbûr Menahim’den da‘vâsına mutâbık beyyine taleb olundukda ityân-ı beyyine için üç gün tamâmına değin istimhâl ettikde ba‘de’l-imhâ[l] ityân-ı beyyineden aczi zâhir olmağın edâsına tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min Zilka‘deti’ş-şerîfe li sene semânin ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Ali b. Abdullah, Halil b. Muslihiddin, İsak v. Salamon ve gayruhüm
|