.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 222
Hüküm no: 277
Orijinal metin no: [152-154]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma Hâtun bt. Hacı Ali’nin evini vakfettiğine dâir düzenlenen vakfiyesi

Elhamdü lillâhi alâ tevâlî nevâlihî ve’s-salâtü alâ Muhammedini’l-kerîm ve âlihî ve ba‘dehû işbu husûs-ı âti’l-beyânın mahallinde tahrîri iltimâs olunmağın bu fakīr zeyl-i kitâbda mastûrü’l-esâmi olan müslimîn ile Mahmiye-i İstanbul’da Nişâncı Cafer Çelebi mahallesinde sâkine sâhibetü’l-hayrât ve’l-hasenât Fâtıma Hâtun bt. el-Hâc Ali’nin menziline varıp akd-i meclis-i şer‘-i mutahhar olundukda mezbûre Fâtıma meclis-i mezbûrda vakf-ı âti’l-beyânı li ecli’t-tescîl mütevellî nasb eylediği fahrü’l-müderrisîni’l-kirâm Mehmed Efendi b. el-merhûm Receb mahzarında ikrâr ve takrîr-i kelâm edip silk-i mülk-i sahîhimde münselik olup Havâss-ı Kostantıniyye muzâfâtından Hasköy nâm kasaba mahallâtından Ahmed Çelebi mahallesinde vâki‘ bir tarafından Hürrem Bey mülkü ve bir tarafından Timur Hâtun mülkü ve bir tarafından Belkıs Hâtun çayırı ve bir tarafından tarîk-i âm ile mahdûd olup dâhiliyesinde iki bâb fevkānî odayı ve üç bâb tahtânî beyti ve bir matbahı ve kileri ve ahırı ve bir su kuyusunu ve cüneyneyi ve kenîfi ve yine menzil-i mezbûrun hâricinde vâki‘ iki bâb tahtânî odayı ve bir su kuyusunu müştemil mülk menzilimi cümle tevâbi‘ ve levâhıkı ile hasbeten lillâhi’l-azîm ve taleben li merdâti’r-Rabbi’r-rahîm vakf ve habs edip şöyle şart eyledim ki, süknâsını evvelâ kendi nefs-i nefisime rûhum kafes-i bedenden civâr-ı rahmete tayerân eyledikde menzil-i mezbûrun dâhiliyesinde vâki‘ iki bâb fevkānî odayı ve kileri ve muhavvatayı ve kenîfi kız karındaşım kızı Ümmühânî mutasarrıf ola ve ba‘dehâ evlâdına ve evlâd-ı evlâd-ı evlâdına batnen ba‘de batnin ile’l-inkırâz ve yine menzil-i mezbûrun hâricinde vâki‘ olup kapının sağ tarafında olan bir bâb tahtânî odayı ve cüneyne ve kileri ve ahırı ve bir su kuyusu ve kenîfi Fâtıma bt. Sefer nâm hâtun mutasarrıfa ola ve ba‘dehâ mezbûre Ümmühânî ve evlâdı batnen ba‘de batnin mutasarrıf ola ve yine menzil-i mezbûrun dâhiliyesinde vâki‘ bir bâb tahtânî odayı utekāmdan Müstakīme bt. Abdullah nâm mu‘tekam mutasarrıfa ola ve ba‘dehâ evlâd ve evlâd-ı evlâdı batnen ba‘de batnin mutasarrıf olalar ve hâricinde vâki‘ kapının sol tarafında olan bir bâb tahtânî odayı utekāmdan Peymâne bt. Abdullah nâm mu‘tekam mutasarrıf ola ba‘dehümâ Ümmühânî’ye ve evlâdına ve evlâd-ı evlâdına batnen ba‘de batnin mutasarrıf olalar ve zikr olunan [153] menzilin kapısının hakk-ı mürûrun cümlesi mutasarrıf olalar ve bu cümlenin inkırâzından sonra -el-iyâzü billâhi’l-iyâz- menzil-i mezkûr Haremeyn-i şerîfeyn mütevellîsi yediyle hasbemâ cerati’l-âdetü îcâr olunup gallesinden hâsıl olan meblağ Medîne-i Münevvere -alâ sâkinihâ efdalü’t-tahiyye- fukarâsına irsâl oluna deyû şart ettikden sonra mütevellî-i mezbûr Mehmed Efendi’ye teslîm edip ol dahi sâir evkāf mütevellîleri gibi mutasarrıf oldu dedikde, gıbbe’t-tasdîki’ş-şer‘î mezbûre Fâtıma i‘âde-i kelâm edip vakf-ı akār cümle e’imme-i kibâr ve müctehidîn-i ahyâr katlarında sahîhdir, lâkin İmâm-ı A‘zam ve hümâm-ı akdem sirâcü’l-milleti ve’d-dîn Ebû Hanîfe-i Kûfî -âmelehullâhu te‘âlâ bi-lutfihi’l-celî ve’l-hafî- katında lâzım olmayıp ve vâkıfe menâfi‘-i vakfı kendiye şart ettikde İmâm Muhammed b. Hasan eş-Şeybânî hazretleri katında bâtıl olmağın vakfından rücû‘ edip kemâkân silk-i mülküne istirdâd ederin dediğinde, mütevellî-i mezbûr cevâb-ı bâ-savâba tasaddî edip fi’l-hakīka imâm-ı müşârun-ileyh hazretleri katında vakf-ı akār lâzım olmayıp ve vâkıfe menâfi‘-i vakfı kendiye şart ettikde İmâm Muhammed katında bâtıldır, ammâ İmâm Ebî Yusuf katında vakf-ı akār sahîh olduğundan sıhhat dahi lüzûmdan mufârık olmayıp ve imâm-ı müşârun-ileyh hazretleri katında vâkıfe menâfi‘-i vakfı kendiye şart eyledikde vakıf sahîh [ve] lâzımdır deyû redden imtinâ‘ edip hâkim-i muvakki‘-i sadr-ı kitâb -hedâhüllâhü te‘âlâ sünene’s-savâb-a murâfa‘a olduklarında hâkim-i mûmâ-ileyh -esbağa ni‘amehû aleyh- ba‘de’t-te’emmül cânib-i vakfı evlâ ve ahrâ görüp alâ kavl-i men yerâhü menzil-i mezbûrun vakfiyyetinin sıhhat [ve] lüzûmuna hüküm ve tescîl edip min ba‘d vakf-ı mezbûrun ibtâl ve ta‘tîli mümteni‘ü’l-ihtimâl oldu, fe-men beddelehû ba‘de mâ semi‘ahû fe-innemâ ismuhû alellezîne yübeddilûnehû innallâhe semî‘un alîm ve ecrü’l-vâkıfeti ale’l-hayyi’l-kayyûm. Hurrire fî evâili Zilka‘deti’ş-şerîfe sene semânin ve erba‘în ve elf min hicret-i men lehü’l-izzu ve’ş-şeref. [154]


Şuhûdü’l-hâl: Fahrü’l-müderrisîn Mehmed Efendi b. Süleyman, Abdülbâkī Çelebi el-Müderris, Mustafa Efendi b. Mehmed el-İmâm, Mustafa Halîfe b. Murad el-Müezzin, Hasan Çelebi b. Mustafa el-Müezzin, Mustafa Subaşı b. Mehmed, Receb Beşe b. Mustafa, Kara Hüseyin Çelebi b. Ahmed, Osman Çelebi b. Receb, Yusuf Beşe b. Abdullah, Mehmed Beşe b. Hürrem er-Râcil, Ahmed b. Musa, Mustafa b. Mehmed, Mehmed Efendi b. Mustafa el-İmâm sâkin-i Hasköy, Mehmed Efendi el-Müezzin sâkin bi-Hasköy, Mahmud Çelebi serrâc-ı hâssa, Mustafa Çelebi b. Halil serrâc-ı hâssa, Ali Beşe b. Ahmed er-Râcil, Kadri Çelebi b. Hasan berber, Ali b. Abdullah berber, Ahmed Çelebi b. Muslu, Mehmed Çelebi Seyyid, Mehmed Bey Çalık, Kenan b. Abdullah ve gayruhüm mine’l-hâzırîn