|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 225 Hüküm no: 280 Orijinal metin no: [155-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
İbrahim Beşe b. Mehmed’in evini Mehmed b. Bilal’e sattığı
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin İbrahim Beşe b. Mehmed nâm râcil meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed b. Bilal nâm kimesne mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûr[e]de vâki‘ bir tarafdan Fâtıma bt. Hüseyin nâm hâtun vakfı ve bir tarafdan müşterî-i merkūm mülkü ve bir tarafdan Balkıza Hâtun mülkü ve bir tarafdan vâdi ile mahdûd ve mümtâz olan bir bâb tahtânî odayı ve bir bâb fevkānî şehnişîni ve bir bi’r-i mâ’ı ve hadîkayı ve muhavvatayı müştemil olan mülk menzilimi mezbûr Mehmed’e kâmil iki yüz riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ol dahi vech-i mübeyyen üzre iştirâ ve tesellüm eyledi, ba‘de’l-yevm zikr olunan menzil merkūm Mehmed’in mülk-i müşterâsıdır keyfemâ yeşâ ve yehtâr mutasarrıf olsun dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Mehmed bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Zilhicceti’ş-şerîfe li sene semânin ve erba‘în ve elf.
Şuhûdü’l-hâl: İbrahim Efendi b. Hüsrev el-İmâm, Mehmed Çelebi b. Mustafa el-İmâm, Mehmed Hoca b. Haydar el-Müezzin, Mehmed Halîfe b. İbrahim el-Müezzin, Mahmud Çelebi b. Mahmud es-Serrâc, Osman Bey b. Mustafa es-Serrâc, el-Hâc Ahmed b. el-Hâc Ali, el-Hâc Behmen b. Abdullah, Yusuf Bey b. Abdullah, Mehmed b. Mehmed el-Müezzin, Hüseyin b. Abdullah, Rıdvan Bey b. Abdullah, Ahmed Çelebi b. Mehmed ve gayruhüm mine’l-hâzırîn
|