.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 226
Hüküm no: 281
Orijinal metin no: [156-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yehya v. Nesan’ın Todoraki v. Tranoz’daki alacağının kefili Kostantin v. Benali tarafından ödenmesinin tenbih edildiği

Mahmiye-i İstanbul’da vâki‘ Balat Câmi‘i kurbunda sâkin Yahudi tâ’ifesinden Yehya v. Nesan nâm Yahudi meclis-i şer‘-i hatîr-i lâzımü’t-tevkīrde Mahmiye-i Üsküdar kazâsı muzâfâtından Kızılada nâm karye sükkânından Kostantin v. Benali [nâm] zimmî muvâcehesinde takrîr-i da‘vâ edip bundan akdem karye-i mezbûre sükkânından Todoraki v. Tranoz nâm zimmîde cihet-i karz-ı şer‘îden yüz otuz riyâlî guruş hakkım olup meblağ-ı mezbûr yüz otuz riyâlî guruşa merkūm Kostantin emr-i kabûlü hâviye kefâletle kefîl olmuşdu, kefâleti hasebiyle merkūmun yedinden seksen bir guruşun aldım bâkī zimmetinde kırk dokuz guruş hakkım kaldı vermede te‘allül eder suâl olunup alıverilmesin taleb ederim dedikde, gıbbe’s-suâl merkūm Kostantin cevâbında fi’l-hakīka mezbûr Todoraki nâm zimmî zimmetinde olan meblağ-ı mezbûr yüz otuz riyâlî guruşa emr-i kabûlü hâviye kefâletle kefîl oldum idi kefâletim hasebiyle benden seksen bir guruş aldı, bâkī zimmetimde kırk dokuz guruş hakkı kaldı deyû bi’t-tav‘i’s-sâf ikrâr ve i‘tirâf edicek merkūm Kostantin’e meblağ-ı mezbûr kırk dokuz riyâlî guruşu merkūm Yahudiye edâya tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis ve’l-ışrîn min Zilhicceti’ş-şerîfe li sene semânin ve erba‘în ve elf.


Şuhûdü’l-hâl: Mehmed Efendi b. Abuzer, Ali Beşe b. Abdullah, Halil b. Muslihiddin, İlya v. ( ) ve gayruhüm