.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 227
Hüküm no: 284
Orijinal metin no: [157-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kölesi için cizye istenen Kosta v. Dimitri’nin Vâlide Sultan Evkâfı reâyâsından olup cizyesini vakfa ödediği

İşbu sene-i mübârekede Mahmiye-i İstanbul ve Galata ve Üsküdar ve Havâss-ı aliyye’de vâki‘ Rum keferesinin yedlerinde olan cevârî ve abîd cizyesini cem‘ine taraf-ı saltanat-ı aliyyeden me’mûr olan hadâyık-ı sultâniyeden Hasbahçe bostancılarından fahrü’l-akrân Mahmud Bey b. ( ) tarafından husûs-ı âti’l-beyâna vekîl olup vekâleti hasm-ı şer‘î-i câhid mahzarında nehc-i şer‘î üzre sâbite olan ( ) Beşe b. ( ) nâm kimesne mahfil-i kazâda işbu bâ‘isü’l-kitâb Kosta v. Dimitri nâm zimmî muvâcehesinde üzerine takrîr-i da‘vâ edip mezbûr Kosta’nın abd-i memlûkü olan ( ) nâm gulâmın üzerine lâzım gelen yüz seksen akçe cizyesini vekâletim hasebiyle mezbûr Kosta’dan taleb ederim suâl olunup alıverilmesi matlûbumdur dedikde, gıbbe’s-suâl merkūm Kosta cevâbında ben kadîmden medîne-i Üsküdar’da vâki‘ merhûme ve mağfûrun-lehâ Vâlide Sultan Câmi‘-i şerîfi evkāfının defterli re‘âyâsından olup ben abdim mezbûr ( ) ile cizyemizi vakf-ı mezbûrun mütevellîsine îfâ ederim, hâlen yedimde mahtûm ve mümzâ sûret-i defter olup mûcebince Âsitâne-i sa‘âdetden emr-i şerîf-i celîlü’l-kadr vardır deyû ibrâz eylediği sûret-i deftere ve emr-i şerîfe nazar olundukda mazmûnları takrîr-i meşrûhuna mutâbık ve âhardan kimesnenin adem-i dahlini nâtık olmağın vekîl-i merkūm ( ) mu‘ârazadan men‘ olunup mâ vaka‘a bi’t-taleb ketb olundu. Tahrîren fi’l-yevmi’s-sâbi‘ ve’l-ışrîn [158] min Zilhicceti’ş-şerîfe li sene semânin ve erba‘în ve elf.


Şuhûdü’l-hâl: Mehmed Efendi b. Abuzer, Ali Beşe b. Abdullah, Halil b. Muslihiddin ve gayruhüm mine’l-hâzırîn