.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 227
Hüküm no: 285
Orijinal metin no: [158-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa Ağa b. İbrahim’in mahzeninin Yahya v. Haron’a satıldığı

Mahmiye-i İstanbul mahallâtından Gül Câmi‘i mahallesinde sâkin fahrü’l-akrân Mustafa Ağa b. İbrahim nâm kimesne tarafından husûs-ı âti’l-beyânı bey‘a vekîl olup vekâleti Halil Halîfe b. Şaban ve Mehmed Beşe b. Abdullah nâm kimesneler şehâdetleri ile sâbite olan hırzu’l-a‘yân diğer Mustafa Ağa b. Ali nâm üstâd-ı hadîka mahfil-i kazâda işbu bâ‘isü’l-kitâb Yahya v. Haron nâm Yahudi muvâcehesinde bi’l-vekâle ikrâr ve takrîr-i kelâm edip müvekkilim mezbûr Mustafa Ağa’nın silk-i mülkünde münselik olup yine Mahmiye-i mezbûrede vâki‘ Tekfursarayı kurbunda vâki‘ bir tarafdan Yako v. Yumtof? ve bir tarafdan Papole v. Yako mülkü ve bir tarafdan Peşoa v. Efendâ mülkü ve bir tarafdan tarîk-i âm ile mahdûd ve mümtâz olan bir bâb süflî mülk mahzenini merkūm Yahya’ya yüz on riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ol dahi vech-i mübeyyen üzre iştirâ ve tesellüm eyledi, ba‘de’l-yevm zikr olunan mahzen merkūm Yahya’nın mülk-i müşterâsıdır keyfemâ yeşâ ve yehtâr mutasarrıf olsun dedikde, vekîl-i merkūmun kelimât-ı meşrûhunu el-mukarru lehü’l-mezbûr Yahya vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin ve’l-ışrîn min Zilhicceti’ş-şerîfe li sene semânin ve erba‘în ve elf.


Şuhûdü’l-hâl: Mehmed Efendi b. Abuzer, Osman Çavuş b. Ali, Yusuf Beşe b. Abdullah serbölük, Memi Beşe b. Hızır