.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 228
Hüküm no: 286
Orijinal metin no: [158-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Dilaver Bey b. Abdullah’ın Gürcü asıllı kölesi Hasan b. Abdullah’la azatlık sözleşmesi yaptığı

Havâss-ı aliyye kazâsına tâbi‘ Hasköy mahallâtından Abdüsselam mahallesinde sâkin Dilâver Bey b. Abdullah nâm kimesne meclis-i şer‘-i hatîr-i lâzımü’t-tevkīrde silk-i mülkünde münselik olan uzun boylu açık kaşlı kara gözlü Gürciyyü’l-asl Hasan b. Abdullah nâm abd-i memlûkünün muvâcehe[sinde] bi’t-tav‘i’s-sâf ikrâr ve takrîr-i kelâm edip sıfat-ı mezkûr ile mevsûf olan abdim mezbûru târih-i kitâbdan her ayda üçer yüz akçe vermek üzre on altı bin dört yüz elli akçeye kitâbete kestim ba‘de’l-yevm [159] meblağ-ı mezbûr on altı bin dört yüz elli akçeyi bana edâ ve teslîm eyleye sâir ahrâr-ı asliyyîn gibi hür olsun dedikde mukırr-ı merkūmun ikrâr-ı meşrûhunu mezbûr Hasan dahi vech-i muharrer üzre kitâbet-i merkūmu kabûl edicek mâ vaka‘a bi’t-taleb ketb olundu. Tahrîren fî evâili Muharremi’l-harâm sene tis‘în ve erba‘în ve elf.


Şuhûdü’l-hâl: Süleyman Efendi b. Mirza el-İmâm, Cafer Çavuş b. Abdullah, el-Hâc Ramazan b. Mahmud, Ali b. Mustafa