|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 228 Hüküm no: 287 Orijinal metin no: [159-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dimo v. Mihal’in meyhânede ortak olduğunun tespiti
Havâss-ı aliyye kazâsına tâbi‘ Hasköy’de sâkin meyhâneci tâ’ifesinden Dimo v. Mihal nâm zimmî meclis-i şer‘-i hatîr-i lâzımü’t-tevkīrde yine tâ’ife-i mezbûrdan Anastaş v. İstefano ve Yani v. Dimitri ve diğer Yani v. Dimitri ve Espolot v. Yani ve Todor v. Yani nâm zimmîler muvâcehesinde üzerlerine takrîr-i kelâm edip mezbûrlar ile meyhânecilik san‘atında şerîk olup zikr olunan meyhâne içinde on dokuz bin akçe sermâyem vardır mezbûrlardan suâl olunup takrîrleri tahrîr olunmak matlûbumdur dedikde gıbbe’s-suâl mezbûrân cevâbında fi’l-hakīka merkūm Dimo’nun zikr olunan meyhâne içinde on dokuz bin akçe sermâyesi vardır deyû bi-tav‘ihim ikrâr ve i‘tirâf edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene tis‘în ve erba‘în ve elf.
Şuhûdü’l-hâl: Ali b. Abdullah, Kiryaki v. Yani, Benapot v. Dimitri ve gayruhüm mine’l-hâzırîn
|