|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 229 Hüküm no: 288 Orijinal metin no: [159-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ahmed Çelebi b. Muslu’nun tasarrufundaki vakıf dükkânları Salamon v. Avraham’a devrettiği
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin Ahmed Çelebi b. Muslu nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Salamon v. Avraham nâm Yahudi muvâcehesinde bi’t-tav‘i’s-sâf ikrâr ve takrîr-i kelâm edip merhûm Pîrî Mehmed Paşa Vakfı’ndan olup yine karye-i mezbûre mahallâtından Pîrî Paşa mahallesinde vâki‘ iki tarafı vakf-ı mezbûr ve bir tarafı Molla Fenârî Vakfı ve bir tarafı tarîk-i âm ile mahdûd ve mümtâz olan üç bâb dükkânı müştemil olup vakf-ı mezbûrdan her ayda yirmi akçe icâre-i mu‘accele ve müeccele ile mutasarrıf [160] olduğum dükkânların hakk-ı tasarrufunu vakf-ı mezbûrun mütevellîsi izniyle mezbûr Salamon’a tefvîz eyledim, ol dahi vech-i mübeyyen üzre tefevvuz ve kabûl eyleyip mukābele-i tefvîzden yedinden nakd-i râyic fi’l-vakt dokuz bin akçe alıp kabz eyledim, mâdem ki beher mâh zikr olunan dükkânların icâre-i müeccelesin vakf-ı mezbûr zâbitlerine edâ ve îfâ eyleye tasarrufuna bir ferd mâni‘ olmaya dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Salamon bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Muharremi’l-harâm li sene tis‘în ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Mehmed Çelebi b. Mustafa el-İmâm, Mehmed Halîfe b. İbrahim el-Müezzin, Mehmed Beşe b. Hasan er-Râcil, Ahmed Çelebi b. Muslu, Osman Bey b. Mustafa es-Serrâc, Mehmed b. Abdullah, Ali b. Abdullah ve gayruhüm mine’l-hâzırîn
|