|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 231 Hüküm no: 292 Orijinal metin no: [161-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yani v. Nikola’nın kefil olduğu borcu ödediği ve asıl borçlu Yorgi v. Vakteli’den talep ettiği, inkârı üzerine sulh oldukları
Gemici tâ’ifesinden Yani v. Nikola nâm zimmî meclis-i şer‘-i hatîr-i lâzımü’t-tevkīrde işbu bâ‘isü’l-kitâb Yorgi v. Vakteli? nâm zimmî mahzarında ikrâr ve takrîr-i kelâm edip bundan akdem mezbûr Yorgi’nin gāib ani’l-meclis olan Anastaş nâm zimmîye cihet-i karz-ı şer‘îden bin iki yüz akçe deyni olup meblağ-ı mezbûr bin iki yüz akçeye ben tarafeynden emr-i kabûlü hâviye kefâletle kefîl olup mârrü’z-zikr bin iki yüz akçeyi kefâletim hasebiyle merkūm Anastaş’a edâ ve teslîm edip mersûm Yorgi’den meblağ-ı mezbûr bin iki yüz akçeyi da‘vâ ve taleb edip suâl olundukda mersûm Yorgi müdde‘â-yı mezbûru inkâr ile cevâb verip beynimizde münâza‘ât-ı kesîr[e] ve muhâsamât-ı [162] şedîde vâkı‘a olmuşdu, el-hâletü hâzihî beynimize muslihûn tavassut edip dört yüz akçeye ıslâh eylediklerinde ben dahi sulh-ı mezbûru kabûl ve bedel-i sulh olan dört yüz akçeyi merkūm Yorgi yedinden ahz u kabz eyleyip husûs-ı mezbûra müte‘allik cemî‘ de‘âvî ve mutâlebâtdan zimmetini ibrâ-i âm ile ibrâ ve ıskāt-ı tâm ile ıskāt eyledim, ba‘de’l-yevm husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Yorgi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis aşer min Muharremi’l-harâm li sene tis‘în ve erba‘în ve elf.
Şuhûdü’l-hâl: Mehmed Efendi b. Abuzer, Ali b. Abdullah, Halil b. Muslihiddin ve gayruhüm mine’l-hâzırîn
|