|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 232 Hüküm no: 294 Orijinal metin no: [162-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Rahime bt. Mustafa’nın boşandığı Mustafa Bey b. Mirza Bey ile mehir ve nafaka alacakları için sulh yaptığı
Havâss-ı aliyye kazâsına tâbi‘ Hasköy mahallâtından Keçeciler mahallesinde sâkine Rahime bt. Mustafa nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb sâbıkan zevci olan Mustafa Bey b. Mirza Bey serrâc-ı hâssa muvâcehesinde bi’t-tav‘i’s-sâf ikrâr ve takrîr-i kelâm edip bundan akdem mezbûr Mustafa Bey beni [163] tatlîk ettikde zimmetinde mehr-i müeccelimden dört bin akçe hakkım ve iddet nafaka-i mu‘ayyenem bâkī kalıp meblağ-ı mezbûr dört bin akçe hakkımı ve iddet nafaka-i mu‘ayyenemi da‘vâ ve taleb edip suâl olundukda mezbûr Mustafa Bey inkâr ile cevâb verip beynimizde münâza‘ât-ı kesîre ve muhâsamât-ı şedîde vâkı‘a olmuşdu, el-hâletü hâzihî beynimize muslihûn tavassut [edip] bin yedi yüz akçeye inkârdan sulh eylediklerinde ben dahi sulh-ı mezbûru kabûl ve bedel-i sulh olan bin yedi yüz akçeyi mezbûr Mustafa Bey yedinden bi’t-tamâm ve’l-kemâl ahz u kabz eyleyip husûs-ı mezbûra müte‘allik cemî‘ de‘âvî ve mutâlebâtdan ve eymândan zimmetini ibrâ-i âm ile ibrâ ve ıskāt-ı tâm ile ıskāt eyledim, ba‘de’l-yevm benden veyâhud vekîlimden da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde mukırra-i merkūmenin ikrâr-ı meşrûhasını el-mukarru lehü’l-mezbûr Mustafa Bey vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Saferi’l-hayr li sene tis‘în ve erba‘în ve elf.
Şuhûdü’l-hâl: Mustafa Efendi b. Ramazan, Ahmed Bey b. Şükrullah, Mehmed Halîfe b. Ramazan el-Müezzin, Ömer Beşe b. Abdullah, Mehmed Beşe [b.] Zülfikar
|