.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 232
Hüküm no: 295
Orijinal metin no: [163-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Mehmed’in boşandığı Seyyid Mustafa b. Ahmed’in zimmetini mehir, nafaka ve sâir alacaklarından ibrâ ettiği

Havâss-ı aliyye kazâsına tâbi‘ Hasköy mahallâtından Sütlüce mahallesinde sâkine Fâtıma bt. Mehmed nâm hâtun meclis-i şer‘-i hatîr-i lâzımü’t-tevkīrde işbu bâ‘isü’l-kitâb sâbıkan zevci olan es-Seyyid Mustafa b. es-Seyyid Ahmed nâm kimesne mahzarında bi’t-tav‘i’s-sâf ikrâr ve takrîr-i kelâm edip bundan akdem mezbûr Mustafa’nın gāib ani’l-meclis olan Hasan Beşe nâm kimesne[ye] cihet-i karz-ı şer‘îden olan sekiz bin akçe deynini ben kendi mâlımdan merkūm Hasan Beşe’ye edâ ve teslîm edip ve mezbûr es-Seyyid Mustafa dahi beni tatlîk ettikde zimmetinde mehr-i müeccelimden altı yüz akçe hakkım ve iddet nafaka-i mu‘ayyenem bâkī kalmışdı, el-hâletü hâzihî zikr olunan meblağ-ı mezbûr sekiz bin akçeden ve mârrü’z-zikr altı yüz akçeden ve iddet nafaka-i mu‘ayyenemden mezbûr es-Seyyid Mustafa’nın zimmetini ibrâ-i âm ile ibrâ ve ıskāt-ı tâm ile [164] ıskāt eyledim, ba‘de’l-yevm benden veyâhud vekîlimden da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde mukırra-i merkūmenin ikrâr-ı meşrûhasını el-mukarru lehü’l-mezbûr es-Seyyid Mustafa bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Saferi’l-hayr sene tis‘în ve erba‘în ve elf.


Şuhûdü’l-hâl: Abdurrahman Efendi b. Abdullah, Selman Efendi b. Mirza el-İmâm, Mehmed Efendi el-İmâm, Mustafa Halîfe b. Server el-İmâm, el-Hâc Mehmed b. Abdullah, Osman Beşe b. Yakub, Ali b. Abdullah