.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 233
Hüküm no: 296
Orijinal metin no: [164-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Ağa Vakfı’ndan Kiremitçi Manik v. Anberekşah’a borç verilmesi

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin kiremitçi tâ’ifesinden Manik v. Anberekşah nâm Ermeni meclis-i şer‘-i hatîr-i lâzımü’t-tevkīrde işbu bâ‘isü’l-kitâb merhûm Ahmed Ağa Vakfı’na bi’l-fi‘il mütevellî olan Habîb Efendi b. Ahmed nâm kimesne mahzarında bi’t-tav‘i’s-sâf ikrâr ve takrîr-i kelâm edip vakf-ı mezbûr mâlından zimmetimde cihet-i karz-ı şer‘îden beş bin akçe ve târih-i kitâb şehri gurresinden sene-i kâmile tamâmına değin müeccel çuka bahâsından yedi yüz elli akçe deynim olup târih-i mezbûr tamâmında cem‘an beş bin yedi yüz elli akçe zimmetimde vâcibü’l-edâ ve lâzımü’l-kazâ deynimdir dedikden sonra meblağ-ı mezbûr beş bin yedi yüz elli akçeye mahalle-i mezbûre sükkânından Cânek v. Anberekşah ve Hanem v. Manik nâm Ermeniler tarafeynden emr-i kabûlü hâviye kefâletle kefîl oldukda mâ vaka‘a bi’t-taleb ketb olundu. Tahrîren fî târihi’l-mezbûr li sene tis‘în ve erba‘în ve elf.


Şuhûdü’l-hâl: Mehmed Çelebi b. Mustafa el-İmâm, Mahmud Çelebi b. Mehmed es-Serrâc, Mehmed Halîfe b. İbrahim el-Müezzin, Piyâle b. Abdullah, Süleyman b. …? ve gayruhüm