.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 234
Hüküm no: 297
Orijinal metin no: [164-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice Hâtun bt. Abdullah’ın bahçe, mahzen ve dalyanını Haron’a on yıllığına kiraladığı

Fâtıma Sultan’ın âhiret kızı olan fahrü’l-muhadderât Hatice Hâtun bt. Abdullah mahfil-i kazâda Havâss-ı aliyye kazâsı muzâfâtından Hasköy’de vâki‘ bir tarafı mezbûr Haron mülkü ve bir tarafı sâhil-i bahr ve bir tarafı [165] ba‘zan Kosta v. Dimitri nâm zimmî mülkü ve ba‘zan yine mezbûr Haron mülkü ve bir tarafı tarîk-i âm ile mahdûd ve mümtâz olan mülk hadîkamı ve bir bâb fevkānî ve bir bâb tahtânî mülk mahzenimi ve bir bâb mülk dalyanımı cümle tevâbi‘ ve levâhıkıyla icâre-i tavîleyi tecvîz eden ulemâ’-i kirâm -ekserehumullâhu ilâ yevmi’l-kıyâm- kavl-i şerîfleri üzre her üç yılda bir akd-i cedîd olup akd-i evvelin intihâsı akd-i sânînin ibtidâsı olmak üzre mezbûr Haron’a târih-i kitâbdan on sene tamâmına değin beher sene kırk bin akçeye îcâr eyledim, ol dahi vech-i mübeyyen üzre istîcâr eyledi dedikde, mukırra-i merkūmenin ikrâr-ı meşrûhunu el-mukarru lehü’l-mezbûr Haron bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin ve’l-ışrîn min Rebî‘ilevvel li sene tis‘în ve erba‘în ve elf.


Şuhûdü’l-hâl: Fahrü’l-akrân Ahmed Ağa b. Mehmed, Mahmud Çelebi b. Mehmed es-Serrâc, Mehmed b. İbrahim el-Müezzin, İsa Bey b. Mustafa serbölük, el-Hâc Behmen [b.] Abdullah, Himmet [b.] Pürkadem, Mahmud [b.] Hüseyin, Derviş b. Mehmed, Ahmed Bey b. Mehmed serbölük