|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 235 Hüküm no: 300 Orijinal metin no: [166-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ölen Durmuş Bey b. Salih’in evinin vârisleri tarafından borçları için müzâyede ile Mehmed Bey b. Mustafa’ya satıldığı
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin iken fevt olan Durmuş Bey b. Salih nâm kimesnenin verâseti zevce-i metrûkesi Kerime bt. Mehmed nâm hâtuna ve sadrî sagīr oğlu Salih’e münhasıra olduğu mütehakkik oldukdan sonra sagīr-i mezbûrun tesviye-i umûruna savb-ı şer‘îden mansûb vasîsi olan mezbûre Kerime kendi tarafından asâleten ve sagīr-i mezbûrun tarafından vesâyeten mahfil-i kazâda işbu bâ‘isü’l-kitâb Mehmed Bey b. Mustafa nâm bevvâb-ı sultânî mahzarında bi’t-tav‘i’s-sâf ikrâr ve takrîr-i kelâm edip merhûm-ı merkūm medyûnen vefât edip nukūd ve menkūlünden mahalle-i mezbûrede vâki‘ bir tarafı Hüseyin Çelebi b. İbrahim mülkü ve bir tarafı Hüseyin Beşe b. Abdullah mülkü ve iki tarafı tarîk-i âm ile mahdûd ve mümtâz olan iki bâb beyt-i süflîyi ve muhavvatayı ve zât-ı eşcâr-ı müsmire ve gayr-ı müsmire-i müştemil olan mülk menzilden gayrı deynine vefâ eder mâlı olmayıp Turşucu Vakfı’na olan üç bin altı yüz [167] yetmiş beş akçe deyn-i müsbeti için ve Âişe nâm hâtuna olan bin üç yüz akçe deyn-i müsbeti için menzil-i mezbûrun bey‘i lâzım gelmeğin cânib-i şer‘-i kavîmden bey‘ine izin ve icâzet verildi[k]den sonra menzil-i mezbûr sûk-ı sultânî’de kirâren ve mirâren müzâyede olunup rağabât-ı nâs bi’l-külliye munkatı‘a oldukdan sonra mezbûr Mehmed Bey’in üzerinde beş bin nakd-i râyic fi’l-vakt akçede karâr edip ve ziyâde ile tâlib-i âhar dahi zuhûr etmemeğin menzil-i mezbûru asâleten ve vesâyeten merkūm Mehmed Bey’e zarûret-i deyn-i merkūm için merkūmü’l-mikdâr beş bin akçeye bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ eyledikden sonra kabz-ı semen-i ma‘dûd ve teslîm-i mebî‘-i mahdûd eyledim, keyfemâ yeşâ ve yehtâr mutasarrıf olsun dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâili Rebî‘ılâhir li sene tis‘în ve erba‘în ve elf.
Şuhûdü’l-hâl: İbrahim Efendi b. Hüsrev el-İmâm, Mehmed Halîfe b. Haydar el-Müezzin, Muslu Çelebi b. Veli, el-Hâc Ahmed b. Veli, Ali b. Abdullah, Memi Beşe b. ( ), Mehmed Beşe b. Zülfikar, Yusuf b. Abdullah, Mehmed b. Mehmed el-Müezzin, Ali Beşe b. Ahmed er-Râcil
|