|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 236 Hüküm no: 301 Orijinal metin no: [167-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Haron v. İbrayil’in bahçe, mahzen ve dalyanını Hatice Hâtun bt. Abdullah’a sattığı
Havâss-ı aliyye kazâsına tâbi‘ Hasköy’de sâkin Portuval cemâ‘atinden Haron v. İbrayil nâm Yahudi mahfil-i kazâda umdetü’l-muvakkarât zübdetü’l-muhadderât tâcü’l-mestûrât Fâtıma Sultan’ın âhiret kızı olan Hatice Hâtun bt. Abdullah mahzarında bi’t-tav‘i’s-sâf ikrâr ve i‘tirâf edip silk-i mülkümde muntazam olup karye-i mezbûrede vâki‘ bir tarafı benim mülküm ve bir tarafı sâhil-i bahr ve bir tarafı ba‘zan Kosta v. Dimitri nâm zimmî ve ba‘zan yine benim mülküm ve bir tarafı tarîk-i âm ile mahdûd ve mümtâz olup tarîk-i âm tarafında vâki‘ bennâ zirâ‘ıyla tûlen yirmi dokuz buçuk zirâ‘ ve arzan on altı buçuk zirâ‘ bi-hesâb-ı şatrancî dört yüz altmış beş zirâ‘ mülk hadîkamı ve yine deryâ tarafında vâki‘ tûlen yirmi sekiz zirâ‘ ve on beş parmak ve arzan on bir zirâ‘ bi-hesâb-ı şatrancî üç yüz on üç zirâ‘ hadîkamı ve yine deryâ tarafında vâki‘ tûlen yirmi dört [zirâ‘] ve on sekiz parmak ve arzan dokuz zirâ‘ bi-hesâb-ı şatrancî iki yüz yirmi üç zirâ‘ [168] arsa üzerinde vâki‘ olan bir bâb fevkānî ve bir bâb tahtânî mülk mahzenimi ve yine deryâ tarafında deryâ üzerinde bennâ zirâ‘ıyla tûlen on zirâ‘ on sekiz parmak ve arzan yedi zirâ‘ ve on sekiz parmak bi-hesâb-ı şatrancî seksen üç buçuk zirâ‘ bir bâb dalyanımı merkūme Hatice Hâtun’a kâmilü’l-ayâr üç bin riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim ol, dahi vech-i mübeyyen üzre iştirâ ve tesellüm eyledi, ba‘de’l-yevm zikr olunan hadîka ve mahzen ve dalyan merkūme Hatice Hâtun’un mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre Hatice Hâtun vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Rebî‘ılâhir li sene tis‘în ve erba‘în ve elf.
Şuhûdü’l-hâl: Fahrü’l-akrân Ahmed Ağa b. Mehmed, Mahmud Çelebi b. Mehmed es-Serrâc, Mehmed b. İbrahim el-Müezzin, İsa Bey b. Mustafa serbölük, el-Hâc Behmen b. Abdullah, Himmet b. Pürkadem, Mehmed b. Hüseyin, Derviş b. Mehmed ve gayruhüm
|