|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 237 Hüküm no: 303 Orijinal metin no: [169-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Eğin’deki Ermeniler’in cizye tahsili için seçtikleri Mercan v. Perek’i yolsuzluğu sebebiyle azl ederek muhasebesini görmek için Cuvan v. Fedi’yi vekîl tayin ettikleri
Vilâyet-i Anadolu’da vâki‘ Arapgir sancağına tâbi‘ Eğin nâm kasaba sükkânından Misak v. Serkis ve Ferhad v. Şahbaz ve Serkis v. Onnes ve Agop v. Evedek ve Ağazer v. Murad ve Garez v. Karabet ve Agop v. Dader ve Ağazer v. Evedik ve Gazal v. Varderos ve Agop v. Ero ve Cuvan v. Emircan ve Yoğaz v. Bartin ve Kaspar v. Belenk ve Yakob v. Serkis ve Azad v. Polat ve Gazal v. Toros ve Emircan v. Emerik ve Behzad v. Serkis ve Perek v. Hovit ve Ferhad v. Mikayil ve Toros v. Murad ve Cânem v. Kulaf ve Asuzader v. Ferhad ve Banik v. Manik nâm Ermeniler ve sâirler mahfil-i kazâda yine kasaba-i mezbûreden Mercan v. Perek nâm Ermeni mahzarında her biri üzerine da‘vâ edip târih-i kitâbdan bir sene mukaddem üzerimize edâsı lâzım gelen cizyelerimizi cem‘ ve tahsîl edip kazâ-i mezbûrede cizye cem‘ine me’mûr olan kimesnelere teslîm etmek için mezbûr Mercan’ı tarafımızdan tevkîl eyleyip ol dahi vekâlet-i mahkiyesi hasebiyle hizmet-i mezkûreye mübâşereti sebebiyle her birimizden cizyelerimizi cem‘ etmişdi, hâlen mezbûr Mercan’ın müddeti tamâm olduğundan mâ‘adâ adem-i istikāmeti zâhir olup kendiden dahi hoşnûd olmadığımız cihetden vekâletden azl eyledik, bizden kabz eylediği mâlın hesâbını vermeye yine kasaba-i mezbûre sükkânından olup işbu hâzır bi’l-meclis olan Cuvan v. Fedi nâm Ermeni’yi mezbûr Mercan’ın muhâsebesin görmek için tarafımızdan nasb eyledik dediklerinde, merkūm Cuvan dahi vekâlet-i merkūmeyi kabûl ve hizmet-i lâzımesini edâya ta‘ahhüd edicek mâ vaka‘a bi’t-taleb ketb olundu.
Şuhûdü’l-hâl: Mustafa Usta b. Ali, Şaban Efendi b. el-Hâc Bahşî, Muharrem Bey b. Hasan, Osman b. Ramazan
|