.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 238
Hüküm no: 305
Orijinal metin no: [170-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma Hâtun bt. Mehmed’in kızı ile ortak olduğu evdeki hissesini Mihal v. Yani’ye sattığı

Mahmiye-i İstanbul mahallâtından Tercüman Yunus mahallesinde sâkine fahrü’l-muhadderât Fâtıma Hâtun bt. Mehmed meclis-i şer‘-i hatîr-i lâzımü’t-tevkīrde Havâss-ı aliyye kazâsına tâbi‘ Hasköy’de sâkin Mihal v. Yani nâm zimmî mahzarında tav‘an ikrâr ve i‘tirâf edip silk-i mülkümde münselik olup karye-i mezbûrede Papaz İskelesi demekle ma‘rûf iskele kurbunda vâki‘ bir tarafı [171] Kadri Çavuş b. Abdullah mülkü ve bir tarafı sâhil-i bahr ve iki tarafı tarîk-i âm ile mahdûd ve mümtâz olup dört bâb fevkānî beyti ve iki bâb tahtânî mahzeni ve bi’r-i mâ’ı ve muhavvatayı ve limanı muhtevî olup sadriye kızım [Kerime] bt. Hüseyin Çavuş nâm hâtun ile ale’l-iştirâki’s-seviy mutasarrıfa olduğumuz menzilden nısf hisse-i şâyi‘amı merkūm Mihal’e nakd-i râyic fi’l-vakt yetmiş beş bin akçeye bey‘-i bâtt-ı sahîh-i şer‘î ile bey‘ edip teslîm-i nısf-ı mebî‘ ve kabz-ı semen eyledim ba‘de’l-yevm menzil-i merkūmun nısfı merkūm Mihal’in mülk-i müşterâsıdır, keyfemâ yeşâ ve yehtâr mutasarrıf olsun dedikde mukırra-i mezbûrenin ikrâr-ı meşrûhasını el-mukarru lehü’l-merkūm Mihal bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Rebî‘ılâhir li sene tis‘în ve erba‘în ve elf.


Şuhûdü’l-hâl: Mahmud Çelebi b. Mehmed es-Serrâc, Mustafa Çelebi b. Halil es-Serrâc, İsa Bey b. Mustafa serbölük, Mustafa Halîfe b. Yusuf el-Müezzin, Es-Seyyid Ali b. es-Seyyid Mehmed, Ahmed Efendi b. Abdi el-İmâm, el-Hâc Ramazan b. Mustafa el-Müezzin, Hüseyin Çavuş b. Ahmed, Abdülmünîf? b. Hasan, Mehmed Halîfe b. İbrahim el-Müezzin, Abdullah Efendi el-Hâfız ve gayruhüm