.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 240
Hüküm no: 308
Orijinal metin no: [172-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mihal v. Yani’nin evini Fâtıma Hâtun bt. Mehmed Hâtun Vakfı’na bey‘ bi’l-istiğlâl yoluyla sattığı

Havâss-ı aliyye kazâsına tâbi‘ Hasköy’de sâkin Mihal v. Yani nâm zimmî meclis-i şer‘-i hatîr-i lâzımü’t-tevkīrde Mahmiye-i İstanbul mahallâtından Tercüman Yunus mahallesinde sâkine fahrü’l-muhadderât Fâtıma bt. Mehmed nâm hâtun vakfına bi’l-fi‘il mütevellî olan fahrü’l-müderrisîni’l-kirâm Ali Efendi b. Yusuf mahzarında ikrâr ve i‘tirâf edip karye-i mezbûrede Papaz İskelesi demekle ma‘rûf iskele kurbunda vâki‘ bir tarafı Kadri Çavuş b. Abdullah mülkü ve bir tarafı sâhil-i bahr ve iki tarafı tarîk-i âm ile mahdûd ve mümtâz olup dört bâb fevkānî beyti ve iki bâb tahtânî mahzeni ve bi’r-i mâ’ı ve muhavvatayı ve limanı muhtevî olup Kerime bt. Hüseyin Çavuş nâm hâtun ile ale’l-iştirâki’s-seviy mutasarrıf olduğumuz menzilden nısf hisse-i şâyi‘amı altmış bin akçeye bey‘ edip mütevellî-i merkūm Ali Efendi dahi mâl-ı vakıf ile bi-tarîki’l-istiğlâl iştirâ edip kabz-ı semen ve teslîm-i nısf hisse-i mebî‘ eylediğimden sonra menzil-i mezbûru ba‘de’t-tahliyeti’ş-şer‘iyye yine târih-i kitâbdan sene-i kâmile gāyetine varınca mütevellî-i mezbûrdan yedi bin iki yüz akçeye istîcâr eyledim ol dahi vech-i meşrûh üzre îcâr ve teslîm eyledi dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min Rebî‘ılâhir li sene tis‘în ve erba‘în ve elf.


Şuhûdü’l-hâl: Mahmud Çelebi b. Mehmed es-Serrâc, Mustafa Çelebi b. Halil es-Serrâc, İsa Bey b. Mustafa serbölük, Osman Çelebi b. el-Hâc Mehmed es-Serrâc, Hüseyin Efendi b. Hasan el-müsta‘id, Mehmed Çelebi b. Mustafa el-İmâm, Mehmed Çelebi b. Arslan es-Serrâc, Ahmed Çelebi b. Muslu, Mehmed Halîfe b. İbrahim el-Müezzin