.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 241
Hüküm no: 310
Orijinal metin no: [173-176]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kullanılamaz durumda olup kiracısı Salamon v. Avraham tarafından kirasına mahsûben yeniden yaptırılan vakıf evin inşâat masrafının keşf ve tahmîn edilmesi

Medîne-i Hazret-i Ebâ Eyyûb el-Ensârî -aleyhi rahmetü’l-Bârî- muzâfâtından kasaba-i Hasköy’de Kiremitçi demekle ma‘rûf olan Ahmed Çelebi nâm sâhibü’l-hayrın evkāfından olup kasaba-i mezbûre mahallâtından Pîrî Paşa mahallesinde vâki‘ olup bir tarafı merhûm ve mağfûrun-leh Molla Fenârî Vakfı ve iki tarafı vakf-ı mezbûr ve bir tarafı tarîk-i âm ile mahdûd bir bâb attâr dükkânını ve iki bâb mahzeni müştemil olan menzilin icâre-i mu‘accele-i ma‘lûme ve ayda yüz akçe ücret-i müeccele ile mutasarrıfı olan işbu sâhibü’l-kitâb Salamon v. Avraham nâm Yahudi meclis-i şerî‘at-ı Ahmediyye’ye gelip takrîr-i kelâm ve ta‘bîr ani’l-merâm edip vech-i mübeyyen üzre taht-ı tasarrufumda olan menzil mürûr-ı eyyâm ve kürûr-ı şuhûr-i a‘vâm ile bi’l-külliye harâba müşrif olup aslâ kābil-i süknâ olmayıp ve vakf-ı mezbûrda dahi imâret ve meremmete müsâ‘ade olmadığı cihetden vakf-ı mezbûre hâlen meşrûtiyyet üzre mütevellî olan Mehmed Çelebi b. Mustafa’dan bundan akdem ben kendi mâlım ile icâre-i müecceleme mahsûb olmak üzre bir mikdâr akçe harc ve sarf edip müceddeden ba‘zı ebniye ihdâs etmeye me’zûn olmağla hâlen vech-i muharrer üzre müceddeden üç tabaka binâ ihdâs edip zikr olunan tabakāt-ı sâliseden tabaka-i ûlâsında iki bâb ahırı ve zikr oluna[n] arsa-i hâliyede müceddeden kerpiç ile dolma duvar ve tabaka-i [174] sâniyede dört bâb oda ve tabaka-i sâlisede dört bâb fevkānî odalar ve bir önünde tuğla dolma ile döşeme sofa ve bir tahta-pûş ve bir dehliz ve bir mermer çamaşırhâne ve bir matbah ihdâs etmiş[im]dir, hâlen ihdâs eylediğim binâ ne mikdâr akçe harc u sarf eylemek ile olduğunu takvîm ve tahmîn ettirmek murâd ederim savb-ı şer‘-i kavîmden âdem taleb ederim dedikde, kıbel-i şer‘-i şerîf-i mutahhardan bizzat ve hâssa mi‘mârlardan Üstâd Kara Mehmed b. Abdullah ve ebniye ve sukūf ahvâline kemâ[l-i] vukūfları olup zeyl-i kitâbda mastûrü’l-esâmi olan bî-garaz müslimîn ile menzil-i mezbûra varıp akd-i meclis-i şerî‘at-ı Mustafaviyye eyledikde mütevellî-i vakf-ı mezbûr huzûrunda mi‘mâr-ı merkūm menzil-i merkūmun cümle binâsını mesâha eyledikde evvelâ iki bâb ahırın tûlen elli bir zirâ‘ ve arzan yedi zirâ‘ bi-hesâb-ı şatrancî tuğla ile dolma duvarı üç yüz altmış dört zirâ‘ olup her zirâ‘ı kırkar akçeden on dört bin beş yüz altmış akçe ve dört sokak kapısının her birine üçer yüz akçeden bin iki yüz akçe ve dokuz demir pencerelerinin her birine dörder yüz akçeden üç bin altı yüz akçe ve tabaka-i ûlâda ve tabaka-i sâniyede ve tabaka-i sâlisede olan üç bâb kârgîr binâ kenîf kârîzi ile bile üç bin beş yüz akçe ve bir nerdübânına beş yüz ve tûlen ve arzan bi-hesâb-ı mezbûr kireç ile dolma bahçe duvarı yüz iki zirâ‘ olup her zirâ‘ı otuz akçeden dört bin beş yüz akçe ve bir su kuyusuna yedi yüz akçe ve dehliz-i âti’l-beyânı takviyyet için vaz‘ olunan dört sütununa dört yüz seksen akçe ve tabaka-i sâniyede olan dört odanın tûlen ve arzan bi-hesâb-ı mezbûr dolma tuğla duvarı yüz seksen altı zirâ‘ olup her zirâ‘ı kırkar akçeden yedi bin dört yüz kırk akçe ve bir masandıra yük yeri ile bile beş yüz akçe ve tûlen ve arzan bi-hesâb-ı merkūm yüz elli altı zirâ‘ tahta döşemesinin her zirâ‘ına otuz beşer akçeden beş bin dört yüz altmış akçe ve bir nerdübânına beş yüz akçe ve bir matbah ve bir fırınına dört bin akçe ve bir parmaklı penceresine iki yüz akçe ve zikr olunan odaların cidârı tahta ile bölmesi için yirmi sekiz tahtanın her birine onar akçeden iki yüz seksen akçe ve tûlen ve arzan bi-hesâb-ı mezkûr yüz elli altı zirâ‘ tavanının her zirâ‘ına ellişer akçeden yedi bin sekiz yüz akçe ve bir masandıra yük yeri ile bile ve iki dolab ve bir kapısına beş yüz akçe ve tabaka-i sâlisede olan bir bâb odanın tahta sofa döşemesi tûlen ve arzan bi-hesâb-ı merkūm yüz elli altı zirâ‘ olup her zirâ‘ı kırkar akçeden altı bin iki yüz kırk akçe ve bir odasının tahta döşemesi [175] tûlen ve arzan bi-hesâb-ı merkūm yüz elli altı zirâ‘ olup her zirâ‘ı kırkar akçeden altı bin iki yüz kırk akçe ve şehnişîni odanın tahta sofa döşemesi tûlen ve arzan bi-hesâb-ı merkūm kırk dokuz zirâ‘ olup her zirâ‘ı yirmişer akçeden dokuz [yüz] seksen akçe ve zikr olunan şehnişîni odanın üç dolabına dörder yüz akçeden bin iki yüz akçe ve şehnişînine iki bin akçe ve bir matbah ve bir fırınına beş bin akçe ve zikr olunan odaların tûlen ve arzan bi-hesâb-ı merkūm iki yüz dokuz zirâ‘ tuğla duvarının her zirâ‘ı ellişer akçeden on üç bin dört yüz elli akçe ve çamaşırhânesine bin beş yüz akçe ve bir mükemmel ocağına altı yüz akçe ve dört kemerli kapı her biri dörder yüz akçeden bin altı yüz akçe ve iki odanın tavanlarına altı yüz akçe ve on beş billûr camlarına üç bin altı yüz akçe ve tuğla ile döşeme sofası ve zikr olunan matbahın tuğla ile döşemesi tûlen ve arzan bi-hesâb-ı mesfûr doksan sekiz zirâ‘ olup her zirâ‘ı on ikişer akçe on bir bin yedi yüz altmış akçe ve bir tahta-pûş beş yüz akçe ve tûlen ve arzan bi-hesâb-ı merkūm on iki zirâ‘ tahta dehlizin her zirâ‘ı kırkar akçeden dört yüz seksen akçe ve üç kafes üç yüz akçe ve mükemmel masandıra yük yeri ile bile dört bin akçe ve üç sâde kapı altı yüz akçe ve bâlâda zikr olunan odaların tûlen ve arzan bi-hesâb-ı mezkûr üç yüz kırk iki zirâ‘ sakfı olup her zirâ‘ı ellişer akçeden on yedi bin iki yüz akçe ve on dört arabî? pencerelerinin her birine üçer yüz akçeden dört bin iki yüz akçe ve tûlen ve arzan bi-hesâb-ı merkūm yüz elli altı zirâ‘ tavanının her zirâ‘ı altmış akçeden dokuz bin üç yüz altmış akçe cem‘an yüz kırk yedi bin yüz otuz akçeye takvîm ve tahmîn ve bu mahalde bu makūle menzilin binâsı meblağ-ı merkūmdan eksik ile olmaz deyû zeyl-i kitâbda mastûrü’l-esâmi olan bî-garaz müslimîn icmâ‘ ve ittifâk ettiklerinden sonra menzil-i mezbûrun nakzı için mukaddemâ tahmîn olunan râyicü’l-vakt bin dokuz yüz akçe ihrâc olunup ve’l-hâsıl müste’cir-i mezbûrun menzil-i merkūmda icâre-i müeccelesine mahsûb olmak üzre kırk beş bin iki yüz otuz akçesi bâkī kalmağın mâ hüve’l-vâki‘ bi’t-taleb ketb olundu. Tahrîren fî gurreti Cumâdelûlâ [176] li sene tis‘în ve erba‘în ve elf.


Şuhûdü’l-hâl: Mehmed Efendi b. Abuzer, Ahmed Çelebi b. Muslu, Hüseyin Beşe b. Yusuf, Mehmed Halîfe b. İbrahim el-Müezzin, Mehmed Bey b. Abdullah