.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 243
Hüküm no: 311
Orijinal metin no: [176-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Liyaro bt. Nikola’nın evini İlya v. Avraham’a bey‘ bi’l-istiğlâl yoluyla sattığı

Mahmiye-i Galata mahallâtından Karaköy nâm mahal kurbunda Hızır İlyas mahallesi sâkinelerinden Liyaro bt. Nikola nâm Nasrâniyye meclis-i şer‘-i hatîr-i lâzımü’t-tevkīrde Yahudi tâ’ifesinden İlya v. Avraham nâm Yahudi mahzarında bi’t-tav‘i’s-sâf ikrâr ve takrîr-i kelâm edip mahalle-i merkūmede vâki‘ bir tarafı Üsküfcü Vakfı ve iki tarafı hamam cidârı ve bir tarafı tarîk-i âm ile mahdûd ve mümtâz olup üç tabaka beyti müştemil olan mülk menzilimi merkūm İlya’ya kâmil yüz riyâlî guruşa bey‘ edip mesfûr İlya dahi bi-tarîki’l-istiğlâl iştirâ edip kabz-ı semen ve teslîm-i mebî‘ eyledikden sonra menzil-i mezbûru ba‘de’t-tahliyeti’ş-şer‘iyye târih-i kitâbdan sene-i kâmile gāyetine varınca merkūm İlya’dan yirmi riyâlî guruşa istîcâr eyledim ol dahi vech-i meşrûh üzre îcâr ve teslîm eyledi dedikde gıbbe’t-tasdîki’l-vicâhî mâ hüve’l-vâki‘ bi’t-taleb ketb olundu. Tahrîren fî evâili Cumâdelûlâ li sene tis‘în ve erba‘în ve elf.


Şuhûdü’l-hâl: Mehmed Çelebi b. Mustafa el-İmâm, Ahmed Bey b. Şükrullah, Ahmed Çelebi b. Muslu, Sinan Çelebi b. İbrahim ve gayruhüm