.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 244
Hüküm no: 313
Orijinal metin no: [177-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed b. Abdullah’ın Petro v. Dimo’daki hizmet bedeli alacağını talep ettiği ve sulh oldukları

Şerbetçi tâ’ifesinden Ahmed b. Abdullah nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Petro v. Dimo nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip bundan akdem hizmetkâr olup ücretimden mezbûr Petro zimmetinde bin iki yüz akçe hakkım kalıp ücret ile da‘vâ ve taleb edip suâl olundukda mezbûr Petro inkâr ile cevâb verip beynimizde münâza‘ât-ı kesîre ve muhâsamât-ı şedîde vâkı‘a olmuşdu, el-hâletü hâzihî beynimize muslihûn tavassut edip üç yüz akçeye inkârdan sulh eylediklerinde ben dahi sulh-ı mezbûru kabûl ve bedel-i sulh olan üç yüz akçeyi mezbûr Petro yedinden bi’t-tamâm ve’l-kemâl ahz u kabz eyleyip husûs-ı mezbûra müte‘allik cemî‘ de‘âvî-yi mutâlebâtdan ve eymândan zimmetini ibrâ-i âm ile ibrâ ve ıskāt-ı tâm ile ıskāt eyledim, ba‘de’l-yevm benden veyâhud vekîlimden da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde mukırr-ı merkūmun ikrâr-ı meşrûhunu el-mukarru lehü’l-mezbûr Petro vicâhen ve şifâhen tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Cumâdelûlâ li sene tis‘în ve erba‘în ve elf.


Şuhûdü’l-hâl: Mehmed Çavuş b. Abdullah el-Mübâşir, Mehmed Beşe b. Hasan er-Râcil, Ebûbekir b. Mustafa, İbrahim b. Ali ve gayruhüm