.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 245
Hüküm no: 314
Orijinal metin no: [177-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İbrahim Paşa’nın evini zevcesi Havvâ? Hâtun bt. Abdullah’a sattığı

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin mefharü’l-e‘âzımi’l-kirâm muhtârü’l-İslâm ve umdetü’l-ümerâ’i’l-fihâm İbrahim Paşa -beşşerallâhu mâ yeşâ- hazretleri meclis-i şer‘-i hatîr-i lâzımü’t-tevkīrde hâlen zevcesi olun fahrü’l-muhadderât Havvâ? Hâtun bt. [178] Abdullah mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Âişe Hâtun mülkü ve bir tarafı Ömer Bey Vakfı ve ba‘zan Ahmed Ağa mülkü ve bir tarafı Bâzirgân Kızı mülkü ve bir tarafı tarîk-i âm ile mahdûd ve mümtâz olan iki bâb fevkānî odayı ve bir bâb matbahı ve bir kenîfi ve iki bâb tahtânî odayı ve bir kenîfi ve dört bi’r-i mâ’ı ve hadîka-i zât-ı eşcâr-ı müsmire ve gayr-ı müsmireyi müştemil olan mülk menzilimi zevcem mezbûre Havvâ? Hâtun’a iki yüz aded sikke-i haseneyle bey‘-i bâtt-ı sahîh-i şer‘î ile bey‘ edip teslîm-i mebî‘ eylediğimden sonra semen olan meblağ-ı mezbûr iki yüz aded haseneyi müşteriye-i mezkûrenin benim zimmetimde olan cihet-i karz-ı şer‘îden iki yüz aded sikke-i hasene hakkına takas eyledim, ba‘de’l-yevm zikr olunan menzil zevcem mezbûre Havvâ? Hâtun’un mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre Havvâ? Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min Cumâdelûlâ li sene tis‘în ve erba‘în ve elf.


Şuhûdü’l-hâl: Ahmed Efendi b. Abdi el-İmâm, Mehmed Çelebi b. Mustafa el-İmâm, Mahmud Çelebi b. Mehmed es-Serrâc, Ahmed Ağa b. Abdülmennân, Mehmed Halîfe b. İbrahim el-Müezzin, İbrahim Çelebi b. Ahmed, Abdi Bey b. Şaban, Pîrî b. Rıdvan, Hasan b. Pîrî