.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 252
Hüküm no: 325
Orijinal metin no: [186-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Aydın Beşe b. Mahmud’un Ömer Beşe b. Abdullah’a Mora’daki çiftliğinde bulunan emlâkini sattığı ve tarlalarının tasarruf hakkını devrettiği

Vilâyet-i Rumeli’nde vâki‘ Mora Sancağı’ndan Karitena kazâsına tâbi‘ İşterosa nâm karye sükkânından Aydın Beşe b. Mahmud meclis-i şer‘-i hatîr-i lâzımü’t-tevkīrde işbu bâ‘isü’l-kitâb hâssa bostancılardan Ömer Beşe b. Abdullah mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup karye-i mezbûrede vâki‘ bir tarafı Zülfikar Bey çiftliği ve bir tarafı alay beyi olan Sinan Ağa çiftliği ve bir tarafı Kokorat çiftliği ve bir tarafı Teresine çiftliği ile mahdûd ve mümtâz olup İşterosa çiftliği demekle ma‘rûf olan çiftliği içinde vâki‘ beş bâb tahtânî odaları ve bir bâb ahırı merkūm Ömer Beşe’ye nakd-i râyic fi’l-vakt üç bin akçeye bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd eylediğimden sonra ve yine hudûd-ı mezkûrun dâhilinde mevâzi‘-i müte‘addidde vâki‘ tahmînen altmış keyl tohum isti‘âb eder tarlaların hakk-ı tasarrufunu sâhib-i arz ma‘rifetiyle mezbûr Ömer Beşe’ye ferâğat edip mukābele-i ferâğda yedinden yedi bin nakd-i râyic fi’l-vakt akçe alıp kabz eyledim, ba‘de’l-yevm zikr olunan çiftlik cümle tevâbi‘i ve levâhıkı ile mezbûr Ömer Beşe’nin mülk-i müşterâsıdır keyfemâ yeşâ ve yehtâr mutasarrıf olsun dedikde mukırr-ı merkūmun ikrâr-ı meşrûhunu el-mukarru lehü’l-mezbûr Ömer Beşe bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâhiri Cumâdelâhire li sene tis‘în ve erba‘în ve elf.


Şuhûdü’l-hâl: [187] Fahrü’l-müderrisîni’l-kirâm Hüsam Efendi, Mehmed Efendi b. Abuzer, Mahmud Efendi b. Ali, Mehmed Çelebi b. Piyâle, Kurd Bey b. Abdullah, Yusuf Beşe b. Abdullah serbölük-i bahçe-i hâssa, İlyas b. Abdullah, Sinan Beşe b. Receb, Durak b. Hüseyin ve gayruhüm mine’l-hâzırîn