|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 253 Hüküm no: 326 Orijinal metin no: [187-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sabiha bt. Abdullah ile Mahmud Bey b. Mirza’nın muhâlaa yoluyla boşandıkları
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Sabiha bt. Abdullah nâm hâtun tarafından husûs-ı âti’l-beyânı ikrâra vekîl olup vekâleti mahalle-i mezbûre sükkânından Mehmed Çelebi b. Mustafa el-İmâm ve diğer Mehmed b. İbrahim el-Müezzin şehâdetleri ile sâbite olan sulbî kebîr oğlu Ahmed Çelebi b. Muslu nâm kimesne mahfil-i kazâda işbu bâ‘isü’l-kitâb Mahmud Bey b. Mirza nâm cündî mahzarında bi’l-vekâle ikrâr ve takrîr-i kelâm edip mezbûr Mahmud Bey müvekkilem mezbûre Sabiha’nın zevci olup zimmetinde olan iki bin yüz akçe mehr-i müeccelinin ve nafaka-i iddetinin üzerine muhâla‘a edip ve zevciyyete müte‘allik olan cemî‘ de‘âvî ve husûmâtdan mezbûr Mahmud Bey’in zimmetini ibrâ-i âm ile ibrâ eyledim dedikde, vekîl-i merkūmun kelimât-ı meşrûhasında merkūm Mahmud Bey dahi zevcesi mezbûre Sabiha Hâtun ile vech-i mezbûr üzre hul‘ ve ibrâ eylediğini tasdîk ve tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî aşer min Recebi’l-ferd li sene tis‘în ve erba‘în ve elf.
Şuhûdü’l-hâl: Mahmud Çelebi b. Mehmed es-Serrâc, Mehmed Efendi b. Abuzer, Ali b. Abdullah, Halil b. Muslihiddin ve gayruhüm.
|