|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 253 Hüküm no: 327 Orijinal metin no: [187-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mustafa b. Mehmed ile kız kardeşi Halime’nin mülk evlerini Saliha bt. Abdullah’a sattıkları
Mahmiye-i İstanbul’da Cerrâh Câmi‘i kurbunda sâkin Mustafa b. Mehmed nâm kimesne mahfil-i kazâda kendi tarafından asâleten ve li ebeveyn kız karındaşı Halime nâm hâtun tarafından husûs-ı âti’l-beyânı bey‘e vekîl olup vekâleti Hüseyin Beşe b. Mehmed ve zevci Hasan Beşe b. Mehmed er-Râcil ve Hamza b. Abdullah nâm kimesneler şehâdetleri ile sâbite olmağla vekâleten mahfil-i kazâda işbu bâ‘isetü’l-kitâb Saliha bt. Abdullah nâm hâtun mahzarında ikrâr ve takrîr-i kelâm edip Havâss-ı aliyye kazâsına tâbi‘ Hasköy mahallâtından Turşucu mahallesinde vâki‘ bir tarafı Hüseyin b. Mehmed mülkü ve bir tarafı Mehmed b. Abdullah mülkü ve bir tarafı Hüseyin Çelebi mülkü ve bir tarafı tarîk-i âm ile mahdûd ve mümtâz olan bir bâb tahtânî odayı ve bir sofayı ve bir bi’r-i mâ’ı ve muhavvatayı ve eşcâr-ı müsmire ve gayr-ı müsmireyi müştemil mülk menzilin sülüsânı benim mülküm ve sülüsü müvekkilem mezbûre Halime’nin mülkü olup menzil-i merkūmu mezbûre Saliha Hâtun’a nakd-i râyic fi’l-vakt beş bin sekiz yüz akçeye bey‘-i bâtt-ı sahîh-i şer‘î ile bey‘ edip kabz-ı semen-i [188] ma‘dûd ve teslîm-i mebî‘-i mahdûd eyledik, ba‘de’l-yevm zikr olunan menzil mezbûre Saliha’nın mülk-i müşterâsıdır keyfe mâ teşâ ve tahtâr mutasarrıfa olsun dedikde mukırr-ı merkūmun asâleten ve vekâleten ikrâr-ı meşrûhunu el-mukarru leha’l-mezbûre Saliha Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâsıtı Recebi’l-ferd sene tis‘în ve erba‘în ve elf.
Şuhûdü’l-hâl: İbrahim Çelebi b. Hüsrev el-İmâm, Mehmed Halîfe b. Haydar el-Müezzin, Halil b. Ali, Abdünnebi b. Musa, Şaban b. Osman, Hasan Beşe b. Abdullah, Mahmud b. Mehmed el-Müezzin, Dilâver Bey b. Abdullah ve gayruhüm mine’l-hâzırîn
|