.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 254
Hüküm no: 328
Orijinal metin no: [188-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Âişe bt. Mehmed’in vefat eden torunu Hatice’nin terekesini elinde tutan Abdullah Bey b. Mustafa’dan beş bin akçe alarak zimmetini ibrâ ettiği

Havâss-ı aliyye kazâsına tâbi‘ Hasköy mahallâtından Ahmed Çelebi mahallesi sâkinelerinden Âişe bt. Mehmed nâm hâtun tarafından husûs-ı âti’l-beyânı tasdîke vekîl olup vekâleti [mezbûreyi] ma‘rifet-i şer‘î ile ârifân olan Mehmed Efendi b. el-Hâc İbrahim el-Kâtib ve Ali b. Abdullah şehâdetleri ile sâbite olan Mahmud Çelebi b. Mehmed nâm serrâc-ı hâssa mahfil-i kazâda müvekkilem mezbûrenin bundan akdem vefât eden sadriye kızının kızı Hatice’nin babası olup muhallefâtına vaz‘-ı yed eden fahrü’l-akrân Abdullah Bey b. Mustafa mahzarında ikrâr ve takrîr-i kelâm edip müteveffât-ı mezbûrenin cümle muhallefâtı otuz beş bin akçe olup meblağ-ı mezbûr otuz beş bin akçeden müvekkilem mezbûre beş bin nakd-i râyic fi’l-vakt akçe alıp kabz eyledi, husûs-ı mezbûre müte‘allik cemî‘ de‘âvî ve husûmâtdan mezbûr Abdullah Bey’in zimmetini ibrâ ve ıskāt eyledi, ba‘de’l-yevm husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmaya dedi dedikde, vekîl-i merkūmun ikrâr-ı meşrûhunu el-mukarru lehü’l-mezbûr Abdullah Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min Recebi’l-ferd sene tis‘în ve erba‘în ve elf.


Şuhûdü’l-hâl: Mustafa Çelebi b. Halil es-Serrâc, Ahmed Çelebi b. Muslu, Osman Beşe b. Abdullah, Ali Çelebi b. Ömer es-Serrâc, Ali b. Abdullah