.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 255
Hüküm no: 329
Orijinal metin no: [188-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Şaban b. Mehmed’in Mehmed Bey’e olan borcunu ödemesi gerektiği

Havâss-ı aliyye kazâsına tâbi‘ Hasköy’de sâkin Mehmed Bey b. Abdullah nâm kimesne meclis-i şer‘-i hatîr-i lâzımü’t-tevkīrde Şaban b. Mehmed nâm kimesneyi ihzâr ve mahzarında üzerine takrîr-i da‘vâ edip mezbûr Şaban zimmetinde cihet-i karz-ı şer‘îden on beş bin nakd-i râyic fi’l-vakt akçe hakkım olup [189] vermede te‘allül eder, suâl olunup takrîri tahrîr ve alıverilmesi matlûbumdur dedikde, gıbbe’s-suâl mezbûr Şaban cevâbında fi’l-hakīka meblağ-ı mezbûr on beş bin akçe zimmetimde lâzımü’l-edâ ve vâcibü’l-kazâ deynimdir deyû bi-tav‘ihî ikrâr ve i‘tirâf edicek, mezbûr Şaban’a meblağ-ı merkūmu merkūm Mehmed Bey’e edâya tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min Recebi’l-ferd sene tis‘în ve erba‘în ve elf.


Şuhûdü’l-hâl: Mustafa Ağa b. Ali usta-yı bahçe-i Tersâne, Mehmed Efendi b. Abuzer, Ali b. Abdullah ve gayruhüm