.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 255
Hüküm no: 331
Orijinal metin no: [189-2, Arapça]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Nasuh’un evini Mustafa Ağa b. Ali’ye sattığı

Fâtıma bt. Nasuh nâm hâtun meclis-i şer‘-i şerîf ve mahfil-i dîn-i münîfde ikrâr-ı sahîh-i şer‘î ile ikrâr ve i‘tirâf edip işbu akdin sudûruna değin mülkünde ve yedinde ve taht-ı tasarrufunda olan Kostantıniyyetü’l-mahmiyye’de Avcı Bey mahallesinde vâki‘ iki beyt-i ulvîyi ve iki beyt-i süflîyi ve ahırı ve muhavvatayı ve kenîfi ve bi’r-i mâ’ı müştemil olup [190] iki tarafdan Kokona bt. Dimo mülkü ve iki tarafdan tarîk-i âm ile mahdûd olan cemî‘ menzilini bi-cümleti’t-tevâbi‘ ve’l-levâhık mikdârı ve nisâbı olan râyic fi’l-vakt otuz bin fıddî akçe semen-i mu‘ayyen-i makbûza işbu hâmil-i hâze’l-kitâb Mustafa Ağa b. Ali’ye îcâb ve kabûl ile iki tarafdan teslîm ve tesellümü hâvî bey‘ ve şirâ-yı bâtt-ı sahîh-i şer‘î ile bey‘ ettikde ol dahi menzil-i mezbûru ondan kendi mâlı ile ve kendi nefsi için satın aldıkda vicâhen ve şifâhen tasdîk edecek tarafın da tasdîkiyle [mâ vaka‘a bi’t-taleb ketb olundu]. Cerâ ve hurrire fi’l-yevmi’t-tâsi‘ ve’l-ışrîn min Recebi’l-ferd li sene tis‘în ve erba‘în ve elf.


Şuhûdü’l-hâl: Abdullah Efendi b. Nurullah el-İmâm, es-Seyyid Mustafa b. es-Seyyid Zeynelâbidin, Halil b. Şaban, el-Hâc Yunus, Şaban b. Eyyûb, es-Seyyid Zeynelâbidin b. es-Seyyid Mustafa, es-Seyyid Mustafa b. es-Seyyid Mustafa, Ali b. Abdullah, Şahin b. Hasan, Halil b. Mustafa, Receb b. İbrahim ve gayruhüm mine’l-hâzırîn İşbu gurre-i Şa‘bânü’l-mu‘azzam sene tis‘a ve erba‘în ve elf târihinde ferâğ vukū‘ buldu. (Mühür) Kadîr olan Allah’ın yanında fakīr olan hakīr Abdünnebi b. Ömer Eyyûb el-Ensârî -aleyhi rahmetü’l-Bârî- muzâfâtından Hasköy diye bilinen işbu mahkemeye a‘lemü’l-ulemâ’ fi’l-esbak ve eşrefü’l-fuzalâ ale’l-ıtlâk Havâss-ı aliyye kadısı Çavuşzâde diye meşhûr İbrahim Efendi zamânında gurre-i Şa‘bânü’l-mu‘azzam li sene tis‘în ve erba‘în ve elf târihinde cülûs etti.