.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 256
Hüküm no: 332
Orijinal metin no: [190-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Râziye bt. Osman ile Mehmed b. Pürkadem’in muhâlaa ile boşandıkları

Medîne-i Eyyûb el-Ensârî -aleyhi rahmetü’l-Bârî- muzâfâtından Hasköy’de Hacı mahallesi sâkinelerinden Râziye bt. Osman mahfil-i kazâda zevci Mehmed b. Pürkadem mahzarında takrîr-i kelâm edip sulbiye-i sagīre kızım Âişe’den ve sulbiyân-ı sagīrân oğullarım Mustafa ve Mehmed’den ve iki bin beş yüz akçe mehr-i müeccellimden ve nafaka-i iddetimden ve zevciyyete müte‘allik cemî‘ da‘vâmdan ferâğat edip mezbûr zevcim ile hul‘ ettim, ol dahi minvâl-i meşrûh üzre hul‘a râzı olup birbirimizin zimmetini husûs-ı mezbûra müte‘allik cemî‘ da‘vâdan ibrâ-i âm ile ibrâ ve hakkımızı ıskāt edip kat‘-ı alâka ettik, min ba‘d da‘vâ ve nizâ‘ımız kalmadı, eğer da‘vâ ve taleb edersem asâleten ve vekâleten inde’l-hükkâmi’l-kirâm mesmû‘a ve makbûle olmasın dedikde, mezbûr Mehmed b. Pürkadem dahi mezbûre Râziye bt. Osman [191] nâm hâtunun vech-i meşrûh üzre cârî olan kelâmını bi’l-muvâcehe tasdîk edicek mâbeynleri tefrîk olunup mâ hüve’l-vâki‘ bi’t-taleb ketb olunup yed-i tâlibe vaz‘ olundu. Cerâ zâlike ve hurrire fi’l-yevmi’l-hâdî aşer min Şa‘bâni’l-mu‘azzam li sene tis‘în ve erba‘în ve elf.


Şuhûdü’l-hâl: Ali b. Hasan, Musa b. ( ), Emir b. Pürkadem, Mehmed Efendi el-Hatîb, Ahmed b. Abdi el-İmâm, Murad b. Hızır, Ali b. Ahmed, Mustafa b. Halil, Hüseyin Dede, Ahmed b. İlyas, Ali b. İshak, Hızır b. Murad ve gayruhüm