.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 257
Hüküm no: 333
Orijinal metin no: [191-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Havvâ bt. Abdullah’ın evini Mehmed b. Pürkadem’e sattığı

Budur ki Havâss-ı aliyye muzâfâtından Hasköy’de el-Hâc Şaban mahallesinde sâkine Havvâ bt. Abdullah nâm hâtun meclis-i şer‘-i hatîr-i lâzımü’t-tevkīrde işbu hâmilü’l-kitâb Mehmed b. Pürkadem mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafdan Bekir b. Ömer mülkü ve bir tarafdan Mehmed b. Mehmed mülkü ve bir tarafdan Mustafa b. Mehmed mülkü ve bir tarafdan Mehmed b. Abdülcebbâr mülkü ile mümtâz ve mahdûd olan iki bâb fevkānî beyti ve bir bâb tahtânî beyti ve ahırı ve bi’r-i mâ’ı ve kenîfi ve muhavvatayı ve içinde iki göz tahta anbarı muhît ve müştemil mülk menzilimi cümle tevâbi‘ ve levâhıkı ile mezbûr Mehmed’e fıddî nakd-i râyic fi’l-vakt on dört bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm eyledim, ol dahi iştirâ ve kabûl ve tesellüm eyledikden sonra semen-i mezbûr on dört bin akçeyi bi’t-tamâm ve’l-kemâl ahz ü kabz eyledim ba‘de’l-yevm zikr olunan menzil mezbûr Mehmed b. Pürkadem’in mülk-i müşterâsıdır, keyfemâ yeşâ ve yehtâr mutasarrıf olsun dedikde, mukırra-i mezbûre Havvâ bt. Abdullah’ın minvâl-i meşrûh üzre cârî olan ikrârını merkūm Mehmed b. Pürkadem vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Hurrire fi’l-yevmi’l-hâmis aşer min Şa‘bâni’l-mu‘azzam sene tis‘în ve erba‘în ve elf.


Şuhûdü’l-hâl: Murad b. Kalender, Behmen b. Abdullah, Abdülbâkī b. Ahmed, Mehmed b. Turgud, Ahmed Efendi b. Abdi el-İmâm, Hüseyin Sofu el-Müezzin, Mustafa [b.] Hüseyin, Hızır b. İlyas, Ali b. Abdullah, Bekir b. Ömer, Ali b. İshak, Hüseyin b. Uğurlu, Receb b. Mehmed ve gayruhüm?