|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 258 Hüküm no: 336 Orijinal metin no: [192-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Derviş’in kızı Fâtıma’nın geçimini sağlayamadığından Halil Dede’ye besleme olarak verdiği ve nafaka tayin edildiği
Budur ki Havâss-ı aliyye muzâfâtından Hasköy’de Halil Dede b. İbrahim meclis-i şer‘de Derviş nâm râcil mahzarında takrîr-i kelâm ve bast-ı merâm edip hâlen mezbûr Derviş’in sulbiye-i sagīre kızı Fâtıma’nın nafaka ve kisvesinden âciz ve kāsır olup bana besleyip terbiye için vermişdir, suâl olunup yevmî nafaka takdîr olunması matlûbumuzdur dedikde, mezbûr Derviş’e suâl olunup [ol da]hi cevâbında fi’l-hakīka fakīrü’l-hâl olup sulbiye-i sagīre kızım Fâtıma’nın nafaka ve kisvesinden âciz ve kāsır olup merkūm Halil Dede’ye besleyip terbiye için vermişdim, cânib-i şer‘den nafaka takdîr olunsun deyû i‘tirâf ettikde cânib-i şer‘de yevmî beşer akçe nafaka takdîr olunup mâ vaka‘a bi’t-taleb ketb olundu. Hurrire fi’l-yevmi’s-sâbi‘ min şehri Şa‘bâni’l-mu‘azzam li sene tis‘în ve erba‘în ve elf.
Şuhûdü’l-hâl: Ahmed b. ( ), Osman b. ( ), Ali b. ( ) el-muhzır, Fahrü’l-müderrisîn Halil Efendi
|