.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 259
Hüküm no: 338
Orijinal metin no: [193-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Harib v. Asuzader’in ölmeden önce bazı şahıslara borcu olduğunu ikrâr ve evinin satılarak borcunun ödenmesini vasiyyet ettiği

Havâss-ı aliyye kazâsına tâbi‘ Hasköy mahallâtından Abdüsselam mahallesinde sâkin iken mürd olan Harib v. Asuzader nâm Ermeni’nin sulbî kebîr oğlu olup bundan akdem hâlik olan Kurd’un sulbî sagīr oğlu Asuzader nâm sagīrin vasîyy-i muhtârı olan Onnes v. Emrik nâm Ermeni mahfil-i kazâda takrîr-i kelâm edip mürd-i merkūm Harib hâl-i hayâtında iken gāib ani’l-meclis olan a‘lemü’l-ulemâ’i’l-izâm efdalü’l-fuzalâ’i’l-fihâm Kasım Efendi hazretlerine yetmiş riyâlî ve Cemşid Çavuş nâm kimesneye yüz on riyâlî guruş ve Kirakoz nâm Ermeni’ye yüz beş riyâlî guruş ve Fedi nâm Ermeni’ye altmış riyâlî guruş ve Behruz v. Marderos nâm Ermeni’ye on beş riyâlî guruş ki cem‘an üç yüz altmış riyâlî guruş zimmetimde lâzımü’l-edâ ve vâcibü’l-kazâ deynim vardır, edâ-i deyn için sâkin olduğum menzilimi bey‘ edip zikr olunan meblağ-ı mezbûrları ashâblarına edâ ve teslîm eyleye deyû müslimîn huzûrunda vasiyyet eyledi, hakīkat-i hâle vukūfu olup hâzır olanlardan istihbâr olunup takrîrleri [tahrîr] olunmak matlûbumdur dedikde, meclis-i müşârun-ileyhde hâzır olanlardan mahalle-i mezbûre sükkânından İbrahim Efendi b. Hüsrev el-Hatîb ve Mehmed Hoca b. Haydar el-Müezzin ve diğer Mehmed Çelebi b. Mehmed el-Müezzin ve Papa Kaspar v. Asuzader alâ tarîki’ş-şehâde meclis-i şer‘a hâzırûn olup fi’l-hakīka mürd-i merkūm Harib hâl-i hayâtında iken bizim huzûrumuzda gāib ani’l-meclis olan müşârun-ileyh Kasım Efendi hazretlerine yetmiş riyâlî guruş ve Cemşid Çavuş’a yüz on riyâlî guruş ve Kirakoz nâm Ermeni’ye yüz beş riyâlî guruş ve Fedi nâm Ermeni’ye altmış riyâlî guruş ve Behruz nâm Ermeni’ye on beş riyâlî guruş ki cem‘an üç yüz altmış riyâlî guruş mezbûrlara zimmetimde lâzımü’l-edâ ve vâcibü’l-kazâ deynimdir, edâ-i deyn için mülk menzilimi bey‘ edip zikr olunan meblağ-ı mezbûrları ashâblarına edâ ve teslîm eyleye deyû müslimûn huzûrunda vasiyyet eyledi, biz bu husûsa şâhidleriz deyû alâ tarîki’ş-şehâde ihbâr ettiklerinde mâ vaka‘a gıbbe’t-taleb ketb olundu. Tahrîren fî evâili Ramazâni’l-mübârek li sene tis‘în ve erba‘în ve elf.


Şuhûdü’l-hâl: Süleyman Efendi b. Mirza el-İmâm, Mehmed Halîfe b. İbrahim el-Müezzin, Mustafa Çelebi b. Abdullah er-Râcil, Mehmed Beşe b. Abdullah, Ferhad v. Şahbaz, Miyas v. Tanaş papaz, Asuzader v. Ağanes papaz, Somadan v. Ağanes, Marderos v. Zühre, Pizos v. Aznor, Agop v. Mirsad, Gülbeği v. Payender ve gayruhüm.