|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 260 Hüküm no: 339 Orijinal metin no: [193-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Asuzader’in dedesinden miras yoluyla kendisine kalan mallarını ve parasını vasîsinden teslim aldığı
Havâss-ı aliyye kazâsına tâbi‘ Hasköy mahallâtından Turşucu mahallesinde sâkin Asuzader v. Foret nâm Ermeni meclis-i şer‘-i hatîr-i lâzımü’t-tevkīrde işbu bâ‘isü’l-kitâb vasiyyü’l-muhtârı olan Onnes v. Emrik nâm Ermeni mahzarında bi’t-tav‘i’s-sâf ikrâr ve takrîr-i kelâm edip bundan akdem ceddim Harib nâm zimmî mürd oldukda ben sagīr olmağın merkūm Onnes vasîm olup [194] ceddim merkūm Harib’den bana intikāl eden emvâlimi kabz ve zabt etmişdi, hâlen ben âkil ve bâliğ olup emvâlimi bi-nefsihî hıfz ve sıyânete kemâl-i iktidârım olmağın vasîyy-i merkūmun makbûzu olan on iki bin nakd-i râyic fi’l-vakt akçeyi ve tasarrufunda olan emlâkimi vasîyy-i merkūmdan alıp kabz eyledim, ba‘de’l-yevm ceddim mürd-i merkūmdan intikāl eden mâlımdan vasîyy-i merkūm zimmetinde bir akçe ve bir habbe hakkım kalmayıp zimmetini husûs-ı mezbûra müte‘allik cemî‘ de‘âvî ve husûmâtdan ibrâ[-i] âm ile ibrâ ve ıskāt-ı tâm ile ıskāt eyledim dedikde, merkūm Onnes dahi bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek sene tis‘în ve erba‘în ve elf.
Şuhûdü’l-hâl: Kaspar v. Asuzader papaz, Mağdavat v. Harib, Arend v. Bâli, Asuzader v. İskender, Kumru v. Ferhad, Arzhan v. Gazal, Bedros v. Gazal, Marderos v. Emrik, Şirin v. Misak Derkenâr: Gurre-i Şa‘bân’ın sekizinci günüyle Pazar ertesinde Bey oğlu Ahmed Ağa’nın evine nakl olundu sene 1049.
|