|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 261 Hüküm no: 341 Orijinal metin no: [194-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Harib v. Asuzader’in evinin vârisleri tarafından Agop’a satıldığı
Havâss-ı aliyye kazâsına tâbi‘ Hasköy mahallâtından Abdüsselam mahallesinde sâkin iken mürd olan Harib v. Asuzader nâm Ermeni’nin verâseti oğlunun oğlu Asuzader v. Kurd’a ve sad[ri]ye kebîre kızları Nazlı ve Aslı nâm Nasrâniyyelere münhasıra olduğu şer‘an mütehakkik oldukdan sonra mezbûr Asuzader asâleten ve mezbûretân Nazlı ve Aslı tarafından husûs-ı âti’l-beyânı bey‘a vekîl olup vekâleti nehc-i şer‘î üzre sâbite olan Onnes v. Emrik nâm Ermeni mahfil-i kazâya gelip işbu bâ‘isü’l-kitâb Agop v. Makdise nâm Ermeni mahzarında her biri ikrâr-ı tâm ve takrîr-i kelâm eyleyip mürd-i merkūmun mülkü olup mahalle-i mezbûrede vâki‘ bir tarafı [195] Medîne-i Münevvere Vakfı ve bir tarafı Safiye Hâtun Vakfı ve iki tarafı tarîk-i âm ile mahdûd ve mümtâz olup üç bâb fevkānî beyti ve üç fevkānî sofayı ve dört bâb tahtânî beyti ve matbahı ve ahırı ve fırını ve bi’r-i mâ’ı ve kenîfi müştemil olan menzili bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Agop nâm Ermeni’ye beş yüz on riyâlî guruşa bey‘ ve teslîm edip ol dahi minvâl-i muharrer üzre iştirâ ve tesellüm eyledikden sonra semeni olan meblağ-ı merkūm beş yüz on riyâlî guruşu mezkûr Agop yedinden bi’t-tamâm ve’l-kemâl ahz ü kabz eyledik, ba‘de’l-yevm sâlifü’z-zikr menzil merkūm Agop’un mülk-i müşterâsıdır keyfemâ yeşâ ve yehtâr mutasarrıf olsun dedikde, mukırrân-ı merkūmânın asâleten ve vekâleten ikrâr-ı meşrûhlarını el-mukarru lehü’l-mezbûr Agop bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek li sene tis‘în ve erba‘în ve elf.
Şuhûdü’l-hâl: İbrahim Efendi b. Hüsrev el-İmâm, Süleyman Efendi b. Mirza el-İmâm, Mehmed Halîfe b. İbrahim el-Müezzin, Mehmed Hoca b. Haydar, Mustafa Çelebi b. Abdullah, Mehmed Beşe b. Abdullah, Mehmed b. Mehmed el-Müezzin, Ferhad v. Şahbaz, Kaspar v. Asuzader papaz, Miyas v. Senaş papaz, Asuzader v. Ağanes papaz, Somadan v. Ağanes, Marderos v. Zühre, Petroz v. Atadar, Behruz v. Marderos, Agop v. Ferhad, Gülbeği v. Babek ve gayruhüm
|