|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 262 Hüküm no: 343 Orijinal metin no: [196-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Yako’nun komşusu Akive’ye tuvaletinin lağımını kendi tasarrufunda olan yerden denize akıtması için izin verdiği
Havâss-ı aliyye kazâsına tâbi‘ Hasköy mahallâtından Pîrî Paşa mahallesinde sâkin Yahudi tâ’ifesinden Yako v. ( ) nâm Yahudi meclis-i şer‘-i hatîr-i lâzımü’t-tevkīrde işbu bâ‘isü’l-kitâb Akive v. Elbezer nâm Yahudi muvâcehesinde bi’t-tav‘i’s-sâf ikrâr ve takrîr-i kelâm edip mahalle-i mezbûre kurbunda vâki‘ sâkin olduğumuz menzilde ikimizin müşterek kenîfi olup lâkin kenîfe karîb müşterek bi’r-i mâ’ ihdâs olmağın zikr olunan kenîfin ref‘ olunmasına hüküm ve tenbîh olundukdan sonra zikr olunan kenîfin benim tasarrufumda olan yerden kârîz edip deryâya icrâ etmesini mezbûr Akive’ye on riyâlî guruşa bey‘ edip kabz-ı semen ettiğimden sonra zikr olunan kârîzi tasarrufumda olan yerden deryâya icrâ etmesine izin verdim dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Akive bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Şevvâli’l-mükerrem li sene tis‘în ve erba‘în ve elf.
Şuhûdü’l-hâl: Mahmud Bey b. Mirza el-Cündî, Aslan v. Yahuda, Yako v. Elkartula, Yako v. Kasrevani, Kemal v. Baroh
|