.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 263
Hüküm no: 344
Orijinal metin no: [196-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Nazlı ve Aslı bt. Harib’in evlerinin yağmur sularının eskiden beri komşularının evine aktığı ve suyolu olduğundan engellenmemesi gerektiği

Vilâyet-i Anadolu’da vâki‘ kasaba-i Eğin’e tâbi‘ Gemürgâp nâm karye sükkânından Nazlı ve Aslı binteyn-i Harib nâm Nasrâniyyeler tarafından husûs-ı âti’l-beyânı da‘vâya vekîl olup şer‘an vekâleti sâbite olan Onnes v. Emrik nâm Ermeni mahfil-i kazâya gelip takrîr-i kelâm eyleyip müvekkilem mezbûretânın Havâss-ı aliyye kazâsına tâbi‘ Hasköy mahallâtından Abdüsselam mahallesinde vâki‘ lede’l-ahâlî ve’l-cîrân ma‘lûmü’l-hudûd olan mülk menzillerinin bir tarafı Dilâver bt. Abdullah nâm ve el-Hâc Süleyman b. Abdullah nâm kimesnenin menzili olup müvekkilem mezbûretânın zikr olunan menzilinden merkūmân Dilâver ve el-Hâc Süleyman’ın menziline yağmur suyu akagelip şimdi merkūm Dilâver ve Süleyman mâni‘ olurlar, cânib-i şer‘den üzerine varılıp mu‘ârazadan men‘ olunması matlûbumdur dedikde cânib-i şer‘den [197] bizzat ve hâssa mi‘mârlardan üstâd Kara Mehmed b. Abdullah ve zeyl-i kitâbda mastûrü’l-esâmi olan müslimîn ile menzil-i mezbûrun üzerine varılıp müşâhede olundukda mezbûretân Nazlı ve Aslı’nın menzilinden merkūmân Dilâver ve el-Hâc Süleyman’ın menziline yağmur suyu akagelip su yolu olduğu mukarrer olıcak merkūmân Dilâver ve el-Hâc Süleyman mu‘ârazadan men‘ birle mâ hüve’l-vâki‘ bi’t-taleb ketb olundu. Tahrîren fî evâili Şevvâli’l-mükerrem sene tis‘în ve erba‘în ve elf.


Şuhûdü’l-hâl: İbrahim Efendi b. Hüsrev el-Hatîb, Süleyman Efendi b. Mirza el-İmâm, Mehmed Halîfe b. Haydar el-Müezzin, Ali b. Abdullah