.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 264
Hüküm no: 347
Orijinal metin no: [198-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Eğin’deki ev hissesinin Yakob’a satışı

Vilâyet-i Anadolu’da vâki‘ Arapgir sancağına tâbi‘ Eğin nâm kasaba sükkânından Asuzader v. Mirek ve Marderos v. Agop ve Pedros v. Mikayil nâm Ermeniler meclis-i şer‘-i hatîr-i lâzımü’t-tevkīrde işbu bâ‘isü’l-kitâb Yakob v. Kirakoz nâm Ermeni mahzarında her biri bi’t-tav‘i’s-sâf ikrâr ve takrîr-i kelâm eyleyip silk-i mülkümüzde münselik olup kasaba-i mezbûrede vâki‘ bir tarafı Siprah v. Altun mülkü ve bir tarafı müşterî-i mezbûr mülkü ve bir tarafı Asuzader mülkü ve bir tarafı tarîk-i âm ile mahdûd ve mümtâz olup merkūm Yakob ile ale’l-iştirâki’s-seviy mutasarrıf olduğumuz menzilin selâse erbâ‘ı olan hisse-i şâyi‘amızı mezbûr Yakob’a nakd-i râyic fi’l-vakt kırk buçuk riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve mebî‘-i mezbûru mahallinde kabza taslît eyledik, ba‘de’l-yevm zikr olunan menzilin selâse erbâ‘ı mezbûr Yakob’un mülk-i müşterâsıdır keyfemâ yeşâ ve yehtâr mutasarrıf olsun dedikde mukırrûn-ı merkūmûnun ikrâr-ı meşrûhlarını el-mukarru lehü’l-mezbûr Yakob bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb [199] ketb olundu. Tahrîren fî evâhiri Şevvâli’l-mükerrem sene tis‘în ve erba‘în ve elf.


Şuhûdü’l-hâl: Asuzader v. Ferhad, Bahâdır v. Averes, Horik v. Mercan, Yagob v. Agob, Peres v. Zirik ve gayruhüm