|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 265 Hüküm no: 348 Orijinal metin no: [198-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Banik ve Canik v. Anberekşah’ın Eğin’deki mülk bağlarını Cuvan v. Fedi’ye sattıkları
Vilâyet-i Anadolu’da vâki‘ Arapgir sancağına tâbi‘ Eğin nâm kasaba sükkânından Banik ve Canik veledey Anberekşah nâm Ermeniler meclis-i şer‘-i hatîr-i lâzımü’t-tevkīrde işbu bâ‘isü’l-kitâb Cuvan v. Fedi nâm Ermeni muvâcehesinde her biri ikrâr ve takrîr-i kelâm eyleyip silk-i mülkümüzde münselik olup kasaba-i mezbûrede vâki‘ bir tarafı Ferahzad v. Agop bağı ve bir tarafı Ceyran v. Murad bağı ve bir tarafı Monak v. Mıgırdiç bağı ve bir tarafı tarîk-i âm ile mahdûd ve mümtâz olup ale’l-iştirâki’s-seviy mutasarrıf olduğumuz mülk bağımızı mezbûr Cuvan’a tâmmü’l-vezn [ve] sahîhü’l-ayâr dört yüz riyâlî guruşa bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledik, ba‘de’l-yevm zikr olunan bağ mezbûr Cuvan’ın mülk-i müşterâsıdır keyfemâ yeşâ ve yehtâr mutasarrıf olsun dediklerinde mukırrân-ı merkūmlarının ikrâr-ı meşrûhlarını el-mukarru lehü’l-mezbûr Cuvan bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fî evâili Zilka‘deti’ş-şerîfe sene tis‘în ve erba‘în ve elf.
Şuhûdü’l-hâl: Osman b. Mustafa, Hasan b. Pîr Veli, Ömer b. Mustafa, Mehmed b. İbrahim, Bektaş b. Tanrıverdi, Cafer b. Uğurlu, Ali Bey, İsmail b. Durmuş, Ferhad v. Şahbaz, Serkis v. Avanes, Mikayil v. Mircan, Bâli v. Emrik, Bahâdır v. Sefer, Bander v. Gülbeği, Yagob v. Kirakoz, Bahtik v. Mircan, Hanem v. Manik
|