.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 267
Hüküm no: 354
Orijinal metin no: [201-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Çelebi b. Arslan’ın evini annesi Rahime bt. Süleyman’a hibe ettiği

Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkin Mehmed Çelebi b. Arslan nâm serbölük meclis-i şer‘-i şerîfi hatîr-i lâzımü’t-teşrîfde vâlidesi olup Rahime bt. Süleyman nâm hâtun mahzarında bi’t-tav‘i’s-sâf ikrâr ve takrîr-i kelâm edip silk-i mülkümde münselik olup mahalle-i mezbûrede vâki‘ iki tarafı mezbûr Mehmed Çelebi mülkü ve bir tarafı Mehmed Efendi el-Kâtib mülkü ve bir tarafı tarîk-i âm ile mahdûd ve mümtâz olan bir bâb fevkānî mülk odamı ve zikr olunan odanın önünde bennâ zirâ‘ıyla on zirâ‘ mülk hadîkamı mezbûre Rahime’ye hibe-i sahîha-i şer‘iyye ile hibe ve temlîk ve teslîm edip ol dahi vech-i mübeyyen üzre meclis-i hibede beyt-i mezbûru kabûl ve ittihâb ve kabz ve tesellüm ve temellük eyledi ba‘de’l-yevm zikr olunan beyt mezbûre Rahime Hâtun’un mülk-i mevhûbesidir keyfe mâ teşâ ve tahtâr mutasarrıfa olsun dedikde mukırr-ı merkūmun ikrâr-ı meşrûhunu el-mukarru leha’l-mezbûre Rahime Hâtun bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ aşer min Muharremi’l-harâm sene hamsîn ve elf.


Şuhûdü’l-hâl: Mahmud Çelebi b. Mehmed serrâc-ı hâssa, Mahmud Bey b. Mirza el-Cündî, Şahin Bey b. Abdullah Çavuş, Mustafa Çelebi [b.] Mirza, Ahmed Çelebi b. Muslu, Mehmed Halîfe b. Mustafa el-İmâm, Osman b. Abdullah, Abdurrahman b. Mehmed, Süleyman b. Yusuf, Mehmed b. İbrahim, Halil b. Muslihiddin