|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 268 Hüküm no: 355 Orijinal metin no: [201-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Âişe bt. Ali’nin, kocası Ali’nin başka yere gittiğinde bâyin talâk ile boş olacağını şart koştuğu beyanıyla, donanma ile sefere giden Ali’den boşanmalarına hükmedildiği
Havâss-ı aliyye kazâsına tâbi‘ Hasköy mahallâtından Ahmed Çelebi mahallesinde sâkine Âişe bt. Ali nâm hâtun mahfil-i kazâya gelip takrîr-i kelâm edip târih-i kitâbdan iki ay mukaddem gāib ani’l-meclis olan zevcim Ali b. ( ) nâm kimesne müslimîn huzûrunda ba‘de’l-yevm ben bir âhar diyâra gidersem benden bâyin talâk ile boş ol deyû şart eyledikden sonra donanma-yı hümâyûndan bedel alıp gitmekle mezbûrdan bâyin talâk ile boş olmuşumdur, vukūfu olan müslimînden istihbâr olunmak matlûbumdur dedikde, karye-i mezbûre sükkânından Ali b. Mustafa ve Mahmud b. Hasan ve Cafer b. ( ) nâm kimesneler alâ tarîki’ş-şehâde meclis-i şer‘a hâzırûn olup gıbbe’l-istintâk mezbûrlar cevâbında fi’l-hakīka târih-i kitâbdan iki ay mukaddem gāib ani’l-meclis olan Ali b. ( ) nâm kimesne bizim huzûrumuzda ba‘de’l-yevm ben bir âhar diyâra gidersem zevcem Âişe benden bâyin talâk ile boş olsun deyû şart eyledikden sonra donanma-yı hümâyûndan bedel alıp gitmişdir deyû ihbâr eylediklerinde mâ hüve’l-vâki‘ bi’t-taleb ketb olundu. Tahrîren fî evâsıtı Muharremi’l-harâm sene hamsîn ve elf.
Şuhûdü’l-hâl: Mustafa Halîfe b. Surûrî el-İmâm, Osman Beşe b. Abdullah er-Râcil, Mehmed b. Serrâc Abdullah, Mehmed Efendi [b.] Menteş, Ali b. Abdullah
|