|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 269 Hüküm no: 358 Orijinal metin no: [202-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hadîka-i sultânî Vakfına Mumcu Zizo’nun borcu olduğu ve mumcuların borca kefil oldukları
Havâss-ı aliyye kazâsına tâbi‘ Hasköy demekle ma‘rûf karye sükkânından olup mumcu tâ’ifesinden Zizo v. Apostol nâm zimmî meclis-i şer‘-i hatîr-i lâzımü’t-tevkīrde yine karye-i mezbûre kurbunda vâki‘ hadîka-i sultâniye’de sâkin olan hâssa bostancıları bölükbaşısı olan Yusuf Beşe b. Abdullah nâm hâssa bostancı mahzarında ikrâr ve takrîr-i kelâm edip hadîka-i mezbûrenin evkāf-ı müteferrika mâlından zimmetimizde cihet-i karz-ı şer‘îden yirmi bir bin akçe ve târih-i kitâb şehri gurresinden sene-i kâmile gāyetine müeccel ve çuka bahâsından üç bin yüz elli akçe ki cem‘an yirmi dört bin yüz elli akçe zimmetimizdedir dedikde, mukırr-ı merkūmun ikrâr-ı meşrûhunu el-mukarru lehü’l-mezbûr Yusuf Beşe tasdîk ve tahkīk ettikden sonra yine mumcu tâ’ifesinden Usta Yani v. Dimitri ve Hırank v. Rizo ve Hobaro v. Dimitri ve Sina v. Ergiri nâm zimmîler meblağ-ı mezbûr yirmi dört bin yüz elli akçeye tarafeynden emr-i kabûlü hâvî kefâletiyle kefîl olduklarında mâ hüve’l-vâki‘ bi’t-taleb ketb olundu. Tahrîren fî evâili Ramazâni’l-mübârek li sene tis‘în ve erba‘în ve elf.
Şuhûdü’l-hâl: Mehmed Efendi [b.] Menteş Hoca, el-Hâc Behmen [b.] Abdullah, Mehmed Bey [b.] Mustafa bevvâb-ı sultânî, Mustafa Beşe [b.] Nurullah, Derviş b. Mehmed, Mustafa Usta b. Ali, Mehmed Çelebi b. Mustafa el-İmâm, Mahmud b. Hasan kethüdâ-i pereme, Mehmed b. Kadri, Mehmed Beşe [b.] Abdullah, Mehmed b. Veli, Ali pazarcı
|