.:: İstanbul Kadı Sicilleri ::. 

Hasköy Mahkemesi 5 Numaralı Sicil (H. 1020-1053/M.1612-1643)
cilt: 23, sayfa: 271
Hüküm no: 361
Orijinal metin no: [203-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Fâtıma bt. Yahya’nın evini Mehmed Bey b. Mustafa’ya sattığı

Faraza ve kaddera’l-hakîmü? Havâss-ı aliyye muzâfâtından Hasköy’de Keçeci[ler] mahallesi sâkinlerinden Fâtıma bt. Yahya nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb Mehmed Bey b. Mustafa nâm serbölük mahzarında bi’t-tav‘i’s-sâf ikrâr ve takrîr ve i‘tirâf edip mahalle-i mezbûrede vâki‘ işbu akdin sudûruna değin silk-i mülk-i sahîhimde münselik olan emlâkimden bir tarafdan Mehmed b. Ali mülkü ve bir tarafdan Mehmed b. Mirza mülkü ve bir tarafdan Bahşâyiş mülkü ve bir tarafdan tarîk-i âm ile mahdûd ve mümtâz olup bir bâb fevkānî ve üç bâb tahtânî beytleri ve bi’r-i mâ’ı ve muhavvatayı zât-ı eşcâr-ı müsmire ve gayr-ı müsmireyi müştemil mülk menzilimi cümle tevâbi‘i ve levâhıkı ile mezbûr Mehmed Bey’e nakd-i râyic fi’l-vakt on sekiz bin akçeye tarafeynde[n] îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i mübeyyen üzre iştirâ ve kabûl eyledikden sonra kabz-ı semen-i ma‘dûd ve teslîm-i mebî‘-i mahdûd eyledim, ba‘de’l-yevm zikr olunan menzil mezbûr Mehmed Bey’in mülk-i müşterâsıdır, keyfemâ yeşâ ve yehtâr mutasarrıf olsun dedikde mukırra-i merkūme Fâtıma’nın minvâl-i muharrer üzre cârî olan ikrârını el-mukarru lehü’l-mezbûr Mehmed Bey vicâhen tasdîk ve şifâhen tahkīk edicek mâ vaka‘a bi’t-taleb ketb olundu. Tahrîren fi’l-yevmi’l-evvel min Muharremi’l-harâm li sene hamsîn ve elf.


Şuhûdü’l-hâl: Mustafa Halîfe b. Surûrî el-İmâm, Ömer Beşe b. Mustafa, İsa Bey [b.] Veli serbölük, Ramazan b. Rüstem, Mustafa b. Yakub, Mehmed Beşe [b.] Ali er-Râcil, Ahmed Bey [b.] Şükrullah el-Cündî, Mustafa Çelebi b. Mirza, Mehmed Bey b. Mustafa