|
Hasköy Mahkemesi 5 Numaralı Sicil (H. 1020-1053/M.1612-1643) cilt: 23, sayfa: 271 Hüküm no: 362 Orijinal metin no: [203-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Bey b. Mustafa’nın evini Fâtıma bt. Yahya’ya sattığı
Havâss-ı aliyye kazâsına tâbi‘ Hasköy mahallâtından Keçeciler mahallesi sâkinlerinden Mehmed Bey b. Mustafa nâm serbölük meclis-i şer‘-i hatîr-i lâzımü’t-tevkīrde işbu hâmilet-i hâze’l-kitâb Fâtıma bt. Yahya nâm hâtun mahzarında bi’t-tav‘i’s-sâf ikrâr ve i‘tirâf edip mahalle-i mezbûrede vâki‘ bir tarafı Mustafa b. Abdullah mülkü ve bir tarafı Veli b. Abdullah mülkü ve bir tarafı Mehmed Bey ( ) nâm serrâc-ı hâssa mülkü ve bir tarafı tarîk-i âm ile mahdûd ve mümtâz olup bir bâb fevkānî odayı ve bir bâb tahtânî odayı ve kenîfi müştemil olan mülk menzilimi mezbûre Fâtıma’ya nakd-i râyic fi’l-vakt dokuz bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip kabz-ı semen-i ma‘dûd ve teslîm-i mebî‘-i mahdûd eyledim, ol dahi vech-i mübeyyen üzre iştirâ ve kabz ve tesellüm eyledi ba‘de’l-yevm zikr olunan menzil mezbûre Fâtıma’nın mülk-i müşterâsıdır keyfe [204] mâ teşâ ve tahtâr mutasarrıfa olsun dedikde mukırr-ı merkūm Mehmed Bey’in ikrâr-ı meşrûhunu el-mukarru leha’l-mezbûre Fâtıma vicâhen tasdîk ve şifâhen tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’l-evvel min Muharremi’l-harâm li sene hamsîn ve elf.
Şuhûdü’l-hâl: Mustafa Halîfe [b.] Surûrî el-İmâm, Ömer Beşe b. Mustafa, İsa Bey [b.] Veli serbölük, Ramazan b. Rüstem, Mustafa b. Yakub, Mehmed Beşe b. Ali er-Râcil, Ahmed Bey [b.] Şükrullah, Mustafa Çelebi [b.] Mirza, Mehmed Bey [b.] Mustafa, Ali b. Abdullah ve gayruhüm
|